Hpakant Lawnghkang Tsirung kawng makau grup yin ni hta dai hpawt manap jau kaw na majan laja lana gap gasat hkat taw ai lam chye lu ai.
Dai hpawt manap kaw na Lawnghkang Mawsiza, Kate, grup yin ni kaw dai hpawt jau kaw na laja lana gap gasat wa ai hpang, Hpakant Myen Hpyen Tatma kawng na laknak kaba ni ding yang gap sharu bun ai lam ni galaw wa ai nga, ginra masha langai KNG shiga de n dai zawn tsun dan wa ai re.
“ Dai hpawt jau kaw na anhte maga na ni Lawnghkang, Mawsiza, Kate grup yin kaw shamu shamawt hkawm taw ai Myen Hpyen ni na Tsirung kawng dap shara hpe anhte maga na ni sa nut jaw dat ai kaw, Myen ni ram ram machyi mat sam ai Tatma kawng maga na Laknak kaba ja ji bai gap bun wa ma ai, Myen ni Drone laknak kaba laja lana bai gap sharu bun ai majaw, anhte maga na ni hting nut mat ai majaw, shani ka-ang ram na gaw bai zim mat sai,” nga tsun ai.
Myen hpyen tatma kawng na laknak kaba si Kate maw lam numbraw kaw wa hkrat ai majaw, mung shawa langai hkala hkrum wa ai lam nga ai hpe sagawn chye lu ai re.
Dai zawn sha, Lawnghkang Sha It Yang ( လေပြင်) mare na ma kaji langai mung hkala hkrum ai lam nga ai hpe chye lu ai.
Lawnghkang the Hpakant lam kaba n tsa, Mawsiza mare Sky Hotel shawng kaw mung, rai n kapaw shi ai laknak kaba langai wa hkrat jung taw nga ai lam ginra masha ni tsun ai re.
Dai hpawt kaw na Lawnghkang grup yin kaw majan laja lana gap gasat wa ai majaw, mung shawa ni yawng tinang man ang ai de hprawng yen ma sai majaw, Lawnghkang mare ka-ang lai hkawm ai masha gadai mung n nga ai lam chye lu ai.
Majan kata pat hkrum taw nga ai mung shawa n kau mung nga taw ai hpe sagawn chye lu ai re.
Myen hpyen ni gaw, n dai shaning kaw na Hpakant de hpyen n-gun kaba jat na, Hpakant ginra yawng hpe n lu n da htim gasat wa na masa nga ai majaw, Hpakant ginra kaw Majan kalang bai kaba wa na masa nga ai lam, Hpyen masa yu maram ai ni tsun tawn ai re.
Myen Hpyen ni gaw, Mashi Kahtawng buga hpung, Seng Chyai Kyuhpyi bum hpe gasat zing madu kau ngut ai hpang, Hpyen n gun shani shagu jat bang taw nga ai lam chye lu ai re.
Myen hpyen ni shani shagu hpyen n gun jat wa ai hte rau, dai hpawt manap kaw na, Lawnghkang Tsi Rung Kawng grup yin ni hta gasat gala majan byin hpang wa taw sai mung rai nga ai.
