Wai Maw Hpyen Yen mung shawa ni, n dai laman shani shagu marang kaba htu taw ai majaw, Muga ginsup ni hten ma wa nna, marang gayun ai lam ni byin taw ai majaw, yak hkak jam jau hkrum nga ai lam hpyen yen mung shawa ni tsun ai re.
Waimaw na Hpyen yen mung shawa ni gaw, Nawng Hkying, N Gan, N pawn, Laban mare ni de hprawng yen taw nga ai ya lahkawng ning du wa nga sai majaw, n ta ginsum ni yawng mung tsam hten wa sai majaw, Nta ginsum gram lajang la na matu garum ningtum ra taw nga ai lam, Nawng Hkying Hpyen yen dabang na kawa la langai KNG de n dai zawn tsun dan wa ai re.
“Laning mi jan lahkawng ni du wa sai majaw, Kawa pawt ni tsam daw ma sai, n pu na ngau ni yawng galai ra sai, Kawa shadaw ni kahkun sha tsam daw ma sai, gade nna yang gaw yawng daw agrawp wa na she tai ai, ya gaw shadaw ngau ni n galai n mai rai taw nga ai,” nga na tsun ai re.
Hpyen yen dum n ta ni hpe jahkring na matu sha, Kawa Muga ni the gan shingbyi na matu sha galaw da ai re majaw, ya aten na wa ai the rau, du hkra ladaw a majaw, tsam hten ma wa ai rai nga ai.
Dai ginra hta ya ten, Kawa yan mi manu lap hkying 7 nga ai majaw, dum n ta ginsum gram lajang la na matu mung, Ja gumhpraw n lu ai ni gaw, yak hkak ai nga matut tsun dan da ai re.
Ya ten gawk langai gram na rai yang, Kawa Yan 25, Muga, Hpri tsut ni ra ai majaw, gawk langai gram na rai yang Sen 5 daram ma ra ai lam chye lu ai re.
Dai sha n ga Kawa the sha gawgap na reyang , nta htingaw 6 kaw na htinggaw 10 grup yin sha mai nga ai ginsum kaba langai hpe lap sen 30 kaw na seng 40 ma ai rai nna, hpun pyen ni the atsawm gaw gap na rai yang gaw lap sen 100 grup yin ma ai nga tsun ai re.
Ndai ten na mayak gaw, yak hkak jam jau ai lam tsun na matu pyi gaya mat sai lam Jamga Mare na hpyen yen amyu shayi langai mung n dai zawn matut tsun dan da ai re.
“Ya ten gaw yawng ni grai yak ai ni hkrai re majaw, garum hpyi na mung agam ai, yak ai ngu tsun na matu pyi grai gaya ai, dai majaw mai byin ai hku na rawng taw ai,” nga tsun ai re.
Nawnghking Laban mare hta hpyen yen dabang 20 jan the htinggaw 1000 jan nga ai rai nna, htinggaw 172 kaw masha jahpan 885 grup yin nga ai lam hpyen yen lit hkam nit sun ai re.
Raitimung hpyen yen dabang langai the langai nbung ai zawn htinggaw jahpan bung yang pi nta masha jahpan shai hkat ai lam n inga ai sha n ga , matut mahkai mayak amyu myu a majaw hpyen yen masha jahpan tut hkrak chye lu na gaw yak nga ai re.