Hpakant Myen Hpyen Byuha kawng na shapyen ai Drone bawm a majaw, Mung Shawa marai lahkawng bai si hkrum wa sai re.
Dai hpawt manap hkying 9 chyen ten daram hta Myen Hpyen dap maga na Drone bawm hkan jahkrat bun ai majaw, Jang Gat maw na shan nu lahkawng si hkrum wa ai re lam ginra masha langai KNG shiga dap de tsun dan wa ai re.
“Dai Hpawt Myi mu wa ai kaw na Drone the sa gap sai, ya du hkra rai yang 10 lang jan sai, Jang Gat kaw gaw, anhte maga na ni shagyit dung ai rai nga ai, dai kaw sa jahkrat ai nga yang, dai makau kaw na mung shawa lahkawng si hkrum wa ai ga rai nga ai, dai yan nu gaw, Palastic bu ni hkan hta ai yan nu re,” nga nna tsun dan wa ai.
Dai Hpawt Bawm sa jahkrat ai Jang Gat Mare gaw, Seng Tawng mare dingsa sa wa lam hte Hpakant Mashi Kahtawng, Yuma, Jang Gat, Seng Tawng mare de sa wa ai lam numbraw shara re lam chye lu ai.
Dai Jang Gat mare gaw KIA the PDF dap ni Shagyit jahkrat da ai shara re lam mung matut chye lu ai re.
Ya ten Myen Hpyen dap ni gaw, Seng Tawng Ginra yawng hpe htim gasat zing la lu na matu Hpyen man lahkawng hku na htu shadut htim gasat taw nga ai mung rai nga ai.
Hpyen Man langai gaw, San Chyoi, Hpa Pyin, Ma Mung, Sabaw Maga lam hku na htu gasat taw nga ai zawn, Maga mi hku na gaw, Seng Tawng Mare dingsa maga hku na htu gasat taw nga ai re hpe chye lu ai.
Seng Tawng Mare dingsa maga hku na htu gasat wa mayu ai majaw, dai hpawt kaw na Jang Gat shagyit hpe sa htim gasat hpang wa ai masa re lam, dai ginra na Hpyen masa yu maram ai nit sun da ai re.
Hpakant ginra Myen ni htu shadut htim gasat wa ai majaw, Mung Shawa si hkala ai lam ni mung law law nga lai wa sai re.