Min Zay Thant Pyithutsit hpung ni Wara Zup Mare Wan Nat
Mung shawa 10 jan hpe mung rim woi mat
Hugawng Lodo lam, Wara Zup mare na Mung Shawa dum nta 16 hpe wan nat jahten kau nna, mung shawa marai 10 jan hpe Min Zay Thant Pyithutsit ni rim woi mat ai lam ginra masha ni tsun ai re.
Lai wa sai March 15 ya jahpawt jau hkying 5 daram aten hta, Min Zay Thant Pyithutsit hpyen n-gun 100 jan hte shang wa nna, dai kaw nga ai KIA Kawa shagyit ni yawng hpe htim gasat amya kau da ya ngut ai hpang mare dum nta 16 hpe mung wan nat jahten kau da ya ai zawn, mare sin na nga taw ai mung shawa marai 10 jan hpe rim woi mat ai nga, ginra masha ni KNG shiga dap de tsun dan ai re.
“15 ya jahpawt jau hkying 5 ram kaw shang wa na nbungli hte lahkawng lang wa jahkrat da ngut ai hpang,n ta yawng rai yang 16 nat kau da ya, dai hpang let htauk si hte Drone bawm gaw pyi she hti n dang hkra bai gap bun na hkying 11 chyen ram hta bai pru mat ai, Shan hte mare wa gap gasat ai shaloi mare sin na nga ai mung shawa marai 10 jan hpe mung rim woi mat ai, n kau hpe gaw dai shana jang bai dat sai, marai 2 hpe gaw ya du rai n dat ya shi ma ai,” nga tsun dan ai re.
Rim woi mat ai mung shawa law malawng hpe dai shana de jang bai dat dat ya ai rai tim, Marai 2 hpe gaw dai ni ten du hkra dat ya ai lam rai n nga shi ai rai na, Sanpya Pyithutsit dap kata hta, zingri san jep taw nga ai nga matut tsun dan wa ai re.
Min Zay Thant Pyithutsit ni mung shawa dum nta 16 nat jahten kau ya ai hta, Mamdum ni mung lawm nna, Mamdum hte nawng, Mam ni yawng mung nat jahte kau da ya ai re.
Online n tsa hta Min Zay Thant Pyithutsit ni, Wa Hka de lung wa ai hpe KIA hkap shingla gasat ai hta Min Zay Thant hpung ni Si sum machyi law wa ai shiga lam, n teng ai nga ginra masha langai KNG de tsun dan wa ai re.
“Min Zay Thant ni Wa Hka de lung wa ai hpe hkap gasat nga shiga hpa nteng ai, ngai Dung 14 na kaba ai ni hpe mung san yu sai”, nga dai ginra na KIA hte matut mahkai nga ai salang langai tsun ai re.
Dai jahpawt hta, laga hpa majan byin ai lam n nga ai sha, Min Zay Thant Pyithutsit ni jahpawt jau hkying 5 ram ten Wara Zup de shang wa ai hpang nbungli shaga dat na, nbungli bawm lahkawng jahkrat bun da ai hpang, Min Zay Thant hpung ni lagaw lam hte htu shadut shang wa na, dai kaw nga ai KIA dap shara ni yawng hpe jahten kau da ya na bai pru mat ai rai nga ai.
Ya ten Wara Zup ginra masha ni yawng lai wa sai February shata kaw na tinang man ang ai shara ni de hprawng yen ma sai rai nna, hpyen yen mung shawa ni a matu garum ningtum lam ni mung ra ahkyak taw nga ai lam tsun ai re.
