Majan ShigaShiga

Manmaw Myen Hpyen dap shara 3 hpe lu zing ai hpang Majan laja lana matut byin nga

Manmaw mare kaba na Myen hpyen Myawk dap hte Hpri Gang dap, Nbungli Pa dap ni hpe KIA htim gasat zing madu ngut ai hpang, Majan laja lana matut naw byin nga ai lam Dukaba Naw Bu tsun ai re.

Nbungli Pa hpe jasan ngut ai hpang Ts.K.Hk 21 dap maga de bai man yawng taw nga ai majaw majan gaw matut laja nga ding yang re lam Dukaba Nhpang Naw Bu KNG de ndai zawn tsun dan wa ai re.

“Manmaw majan gaw ya hte dai သံချပ်ကာ dap hpe gaw 25 ya shana lu sai rai, Myawk dap 366 hpe mung lu sai nga re rai, nbungli pa mung anhte maga na ni zing kau sai nga tsun ai, anhte maga na asan lu jasan na, ya gaw Ts.K.Hk 21 de bai gap gasat taw ai, Myen dap maga na mung nbungli, Drone hte bawm ding yang jahkrat na, majan gaw dai hku ding yang naw laja taw nga ai,” nga tsun ai re.

Dai dap shara ni hpe n tat sum hkra Myen hpyen dap maga na nbungli the shani shagu laja lana sa jahkrat bun wa ai re.

Manmaw Hpri Gang dap hpe htim gasat la lu ai hta, Myen hpyen hprigang maw daw 9 hpe padang dip zing la lu wa ai re.

Nbungli pa hpe htim gasat ai hta mung Nbungli pa sin ai Myen hpyen dap ni hpe gasat zing madu ai hta, nbungli jak sau rung ni yawng hpe wan nat jahten kau da ya lu ai lam shawng lam hpyen shi sawk ni shana wa ai kaw na chye lu ai.

Ya ten Myen hpyen dap maga na mung KIA ni htim gasat zing madu da ai shara ni hta laknak kaba Drone bawm ni ding yang hkan jahkrat bun taw nna, majan laja lana matut gap gasat taw nga ai re.

Ya ten Manmaw mare hta Myen hpyen dap shara 10 jan naw ngam ai rai nna ya naw ngam ai Myen hpyen dap ni hpe matut htim gasat shakre taw nga ai re.

Manmaw majan laja taw nga ai ten Myen hpyen dap maga, KIA Ginjaw ginra mayan ni de Drone nbungli bawm wa jahkrat bun ai lam ni mung nga wa ai re.

January 26 ya shana maga hta, Laisin mare de nbungli bawm 3 wa jahkrat bun wa ai lam chye lu ai.

Related Articles

Back to top button