Mungkan ShigaShiga

Kokang MNDAA hte Myen Hpyen Dap gap hkat jahkring myit hkrum lam lu ai lam Miwa Asuya tsun

Miwa Mungdan Hkwi Min mare hta Myen Hpyen dap hte Kokang MNDAA hkrum jahta bawngban ai lam hta lahkawng maga du ai shara kaw na gap hkat jahkring na ngu ai myit hkrum lam hpe lu wa ai lam chye lu ai.

January 16-17 n htoi lahkawng ya bawng ban ai dai hpawng lamang hta lahkawng maga gap hkat jahkring mat wa na ngu ai lam hpe myit hkrum lam lu wa ai nga, Miwa gumsan mungdan, Maigan hkringmang rung daju a shi sang lang hpawng hta dai ni January 18 ya shani tsun sanglang mat wa ai hpe mu lu ai re.

Ya na zawn lahkawng maga gap hkat jahkring myit hkrum lam lu wa hkra shakut shang lawm garum ai Miwa Gumsan Mungdan Asuya hpe mung chyeju dum ai lam lahkawng maga dap na tsun ai lam matut chye lu ai re.

Gap hkat jahkring lam hte seng na myit hkrum lam lu ai rai tim, ginra shara masat ai lam hte seng na gara hku myit hkrum masat ai ngu hpe gaw a tsawm tup hkrak n chye lu ai re.

 

Ya na zawn lahkawng maga gap hkat jahkring myit hkrum lam lu ai hte rau, Miwa hte Kokang jarit lam Wa hte Kokang Jarit lam ni yawng bai hpaw nna, gunrai hpaga lam ni yawng mi moi na zawn pru shang lam ni galaw taw sai nga, dai ginra na shiga lawk ni hta tsun da ai re.

Miwa Gumsan Mungdan Asuya a matsun hte dai hpawt kaw na Kokang ginra na jarit chyinghka ni yawng bai hpaw sai nga dai ginra hta du nga ai mung shawa ni tsun ai re.

1027 majan masing hpang wa ai hpang, Kokang jarit chyinghka yawng hpe Miwa hte Wa asuya ni kaw na pat kau ya ai majaw, Kokang ginra hta jak sau hte laga gun rai ni ram ram yak hkak mat ai re.

Ya na zawn jarit chyinghka yawng bai hpaw wa ai majaw, dai ginra na mung shawa yawng kabu myit pyaw nga ai hte jak sau hte laga gunrai hkum sum hpa ni shawoi na hte maren wang lu wang lang dut ginlen taw sai re.

Related Articles

Back to top button