NUG Asuya Rung hpaw na hkyen wa ai Hkam Pat mare hta Myen hpyen dap nbungli bawm wa jahkrat gasat

NUG asuya rung hpaw na shiga a majaw India Myen mung lamu ga jarit, Sagiang ginra na Hkam Pat muklum kata hta Myen hpyen dap nbungli bawm 4 wa jahkrat bun wa ai re.
January 16 ya shana hkying 8 ten ram hta Hkam Pat, Kanan Sanpya mare hta bawm 4 lang wa jahkrat bun ai majaw PDF magam gun langai hte mung shawa langai si hkrum wa ai lam chye lu ai.
NUG asuya maga na Hkam Pat Muklum hta NUG rung hpaw na lam tsun shapraw ai rai tim, kaja tatut hta gaw hpa hkrang shapraw ai lam n nga ai nga, dai ginra na KIA magam gun langai KNG shiga de ya na zawn tsun dan wa ai re.
“Shan hte ni dai hku shiga sha shapru ai law, dai hku dung na masing kaba nan gaw rai n mu shi ai, Salang ni chyawm gaw ayen na pru shang gaw rai ma ai, shan hte dai hku shiga shapru na, mana gaw shara 4 kaw nan nbungli bawm wa jahkrat bun da ma ai,” nga tsun ai re.
Myen hpyen dap bawm wa jahkrat ai shara gaw, ginra PDF rung hte Ginwang madang PDF rung shara hte Kanan mare na hpungkyi jawng shara ni hta wa jahkrat bun da ai re.
Nbungli bawm a majaw, PDF magam gun langai hte asak 3 ning re ai ma kaji langai si hkrum wa nna, marai 5 hkala hkrum wa ai re.
Nbungli bawm a majaw, mung shawa dum nta 15 ram hte hpungkyi jawng wang na dum nta yawng hten ayai mat ai re.
NUG Asuya Sagaing ginra hta mung shawa uphkang rung hpaw na lam tsun wa ai hte rau ya na zawn, Hkam Pat mare bawm jahkrat hkrum wa ai nga ginra masha ni tsun maram nga ma ai re.