
Mungmyit Sinli, Munggu Ginwang, Mungbaw WinSeng mare ka-ang na Shawa hte seng ai Mam htu jak htingnu kaba hta, Kokang MNDAA dap ni, shara jahkrat wa ai majaw, Mare masha ni yawng ninghkap nga ai re.
Kokang MNDAA dap ni rung hpaw na matu dap jung shara jahkrat wa ai majaw, dai ni January 20 ya jahpawt hkying 10 ten ram hta mare masha 100 jan sa wa na, sa ninghkap ai lam dai ginra na mung shawa langai KNG Shiga dap de tsun dan wa ai re.
“Kokang MNDAA dap ni shan hte rung jung na nga na shara sa la wa ma ai, dai gaw mare ting hte seng ai shara gat makau kaw ma re, dai shara gaw loi mung dam ai, gat sa gat wa ni sengke mawdaw jahkring jahkra tawn mung manu nna mi, Ma ni ginsup shara mung manu re shara rai nga ai, dai majaw shawa law law hte seng ai shara kaw, dap shara jahkrat wa ai hpe mung shawa ni gaw n ra na jawm ninghkap taw ai ga rai nga ai,” nga tsun dan wa ai re.
Kokang MNDAA dap ni Mungbaw Pa mare kaw na Wing seng mare de lung wa na wa du dap jung na matu hkyen nga ai ten mung shawa yawng sa jawm ninghkap wa ai rai nga ai.
Dai shara gaw lai wa sai 10 jan ning hta Mungsa Naw dum nta masha ni mam htu jak kaba shadun ai shara mung rai nga ai.
Dai ginra hta KIO Uphkang Sairu hte hkrak nga taw ai mare kahtawng langai re majaw, lama Kokang dap ni kaw na shara bai la wa ai rai yang, laknak lang wuhpung shada n ru n ra rai wa na hpe myit tsang ai nga ginra masha wa ndai zawn matut tsun ai re.
“Kokang MNDAA dap ni maga na n tsa de naw tang madun na nga na bai nhtang yu mat wa ma ai, gara hku bai tsun wa na kun gaw nchye shi ai, ndai ginra hta gaw Shanglawt Uphkang hkrang ni hte hkrak nga taw ai shara rai nga ai, mare kaw Kokang MNDAA dap ni rung bai jung wa yang gaw laknak lang wuhpung lahkawng shada ahtik ahtawk rai mang hkang ni byin wa na hpe mung shawa ni tsang ai ga rai nga ai, ngut na mung ndai shara gaw laknak lang wuhpung ni nga na n manu ai law,” nga matut tsun dan wa ai re.

Mungbaw Ginra yawng hta ya ten Kokang MNDAA dap hte Wunpawng Mungdan Shanglawt Hpyendap KIA lahkawng yan dap jung shara jahkrat na uphkang nga ai re.
Laknak lang wuhpawng lahkawng dai hku rau nga taw ai majaw, hkawn kang manghkang ni kaw na hkawt laga lam shagu hta mang hkang lam ni jahkring hkring byin nga ai re.
Dai ginra gaw Wunpawng Mungdan Shanglawt Hpyendap KIA masat Dapba (6) Dung (36) ginra rai nna, Winseng mare hta mung shawa dum nta htinggaw 200 hkawt nga ai mare kahtawng re.
Dai ginra gaw lai wa sai 2023 ning 1027 majan masing teng, Mung Baw Mai Hpang mare na Pyihtutsit dap ni hpe htim shagrawt kau ai hpang, Kokang dap ni dai Mai Hpang mare na Pyithutsit kawng hta dap jung shara jahkrat nga taw ai re.
Dai ginra gaw moi Myen mung Communite (BCP) zang ayai mat ai hpang, Kokang Yang Mu Leng woi awn ai hpung ni uphkang lai wa yu ai hpang, Mungsa La woi awn ai MDA hpung ni 5 ning jan uphkang wa ai re.