Majan ShigaShiga

San Hka mare hta rai n kapaw ai nbungli bawm kaba a majaw, mung shawa ni hkrit tsang taw nga

San Hka mare hta Myen hpyen dap wa jahkrat ai nbungli bawm langai n kapaw ai sha, ga kata lup rawng taw nga ai majaw ginra masha ni hkrit tsang taw nga ma ai re.

Mani January 13 ya shani Myen hpyen dap Jet nbungli langai hte Hpakant Mazup Yang hte San Hka mare kaw bawm wa jahkrat bun ai hta Pound 500 kaba ai nbungli bawm langai San Hka mare na mung shawa dum n’ta wang langai na namdum nhkun hta wa hkrat ang ai majaw, n kapaw ai sha namdum n hkun dingsa hta jun taw nga ai lam ginra masha langai KNG shiga dap de tsun dan ai re.

Mana hte dai hpawt gaw shanglawt maga na ni sa yu ai, ga kaw grai jung taw di n mai shaw ai da, wan sumri htap masum nga ai kaw na, n tsa na htap mi hpe sha naw lu di ai majaw, grai naw tsang ra ai nga tsun ai, ya du hkra gaw rai n lu shaw shi ai ga rai nga ai,” nga tsun dan wa ai re.

Mani hkying 11 ten daram hta San Hka mare kaw wa jahkrat ai nbungli bawm langai n kapaw mat ai hpe lit nga ai KIA dap ni kaw na sa jep yu ai rai tim, kapaw wa chye ai wan sumri hpe a tsawm rai n lu di kau shi ai majaw, rai n mai htu shaw shi ai nga na tsun ai lam ginra masha ni matut tsun dan wa ai re.

N kapaw shi ai nbungli bawm gaw Pound 500 kaba ai nbungli bawm rai nna, dai n bungli bawm a majaw, San Hka mare na mung shawa ni gadai mung n gwi nga na hprawng yen taw nga  ai lam chye lu ai.

January 13 ya shani Myen hpyen dap nbungli bawm wa jahkrat bun ai majaw, San Hka mare na mung shawa marai 9 si ai hta langai gaw salum ana hte kajawng na si lawm mat ai lam chye lu ai.

January 13 ya shani Myen hpyen dap Hpakant Mazup Yang hte Sang Hka mare makau grup yin ni hta bawm 7 lang wa jahkrat bun kau da ai hta တစ်သုံးလုံး Company hte တောက်ပကြယ် Company wang ni hta mung wa hkrat bun wa ai re.

Dai nbungli bawm a majaw, Hpakant ginra mung shawa marai 13 daram si hkrum wa nna, marai 30 hkawt hkala hkrum wa ai re.

Related Articles

Back to top button