Waimaw Lamyang Nang Zaw Yang maga de Myen hpyen dap hpyen n’gun hte htu shadut lung wa ai majaw, majan gap gasat hkat wa ai lam shawng lam magam gun hte ni nawn ai ginra masha ni tsun ai re.
January praw 3 ya shana maga de KIA htim gasat zing madu da ai, Nang Zaw Yang maga de Myen hpyen dap ni mung shawa gunrai htaw mawdaw kaba 3 hte lung wa ai majaw gasat gala majan byin hpang wa ai re nga Shawng lam magam gun hte ni nawn ai Salang langi KNG shiga de tsun dan wa ai re.
“Myen hpyen la ni mung shawa gunrai htaw mawdaw kaba, Leng 12 mawdaw kaba hpring hkra hkra jawn na lung wa ai majaw gap hkat wa ai ga rai nga ai, shan hte rai n lung wa shi yang Drone, laknak kaba ni hte shawng gap bun ai” nga tsun ai re.
Dai ginra ni hta Myen hpyen dap maga de na Drone laknak kaba ni hte shawng sa htim gap gasat wa ai majaw, KIA dap ni shara la nga ai Nang Zaw Yang lam numshe shara kaw na loi hting nut kau ya ra mat ai nga, mung shawa ni tsun ai re.
Myen hpyen dap maga de na laknak kaba ni hte hkrup mara gap shadam bun ai majaw, Lamyang mare na mung shawa dum n ta n kau hten za hkrum ai lam ni nga ai re hpe matut chye lu ai.
Ya na zawn Myen hpyen dap ni htu shadut lung wa ai majaw, lai wa sai January praw 3 ya shana hte praw 4 ya n htoi lahkawng ya laknak kaba ni hte gap gasat hkat wa ai re.
Dai ginra na mung shawa yawng gaw lai wa sai April shata ram kaw na tinang man ang ai Nam de hprawng yen ma sai re.
Ginra masha ni yawng Nam de hprawng yen nga ai majaw, dai ginra hta majan matut laja wa na hpyen yen mung shawa ni nga ai shara ni de du hkra majai matut byin wa na hpe ginra masha ni myit tsang nga ma ai re.