Ndai laman Kanbalu ginwang hta majan byin ai majaw, Myitkyina Mandalay mawdaw lam kaba pat da ai lam chye lu ai.
Dai mayan hta lai wa sai December 31 ya shani kaw na majan gap gasat hkat wa ai majaw, PDF dap maga de na pat da ai rai nna, hkrun lam hkawm mawdaw hte gunrai htaw mawdaw kaba hkying lam pat hkrum taw nga ai nga, mawdaw la ni tsun ai re.
“PDF dap maga de na pat da ai re. lai wa sai 31 ya shani kaw na pat ai, dai pat ai shani gaw n kau hpe naw lai shangun ai, rai timung mani dai ni gaw tsep kawp n lai shangun mat sai dai majaw lam lapran mawdaw hkying hku pat taw nga ai,” nga Mawdaw la langai KNG de tsun dan ai re.
Myitkyina kaw na Mandalay de yu ai maw daw ni Kanbalu ginwang Pe Gyi mare hta pat da hkrum nna, Mandalay kaw na Myitkyina de lung wa ai mawdaw ni gaw, Kanbalu Zi Kung lam numbraw hta pat da hkrum ai re
Myen hpyen dap hte Pyosawhti hpyen n-gun 30 ram lawm ai hpyen hpung ni gaw, Kanbalu Zi Kung mare makau grup yin ni hta hpyen shamu shamawt ai lam ni galaw nna, mung shawa dum nta wan nat jahten hkawm ai lam ni galaw wa ai majaw, dai mayan hta n dai laman majan byin wa nna, Mandalay lam hpe mung gan pat da ai masa re nga ginra masha ni tsun ai re.
Ya na zawn Myitkyina Mandalay lam jahkring hkring pat shatsang ai majaw, Jinghpaw mung de gunrai manu ni ding yang laja taw nga ai re.
Ndai laman hta sha Jinghpaw mung hte Sammung ginra ni de tara n shang sau lagu htaw shalai nga ai hpe Myen hpyen dap ni rim kau ai lam Myen hpyen dap shi laika hta n dau wa ai re.
