2024 ning laman hta Wunpawng mung hte Miwa mungdan jarit mayan yawng ngu na hpe htim shagrawt zing madu kau lu sai majaw, Wunpawng Mundan Shanglawt hpung ginjaw komiti gaw ndai masa hta ningpawt shatai let, jarit mayan simsa lam hpe ngang ngang kang kang gawgap da lu na matu shakut mat na lam tsun tawn ai re.
Lai wa sai 2024 ning laman hta Jinghpaw mung kata ngang ngang kang kang shaning aten na na dap shara jahkrat da ai Myen hpen dap shara ni hpe Wunpawng Mungdan Shanglawt Hpyen dap KIA hte jinghku rawt malan pawng hpawm dap ni shakut shaja ai majaw, shara law law hpe bai lu madu la sai lam 2025 ning shaning ninghpaw shatsam mungga hta Ningbaw kaba Dukaba Nban La tsun mat wa ai re.
Majan masing ninggam shagu hta tatut shanglawm nga ai myutsaw mungtsaw share ninghkring ni yawng hpe shakawn shagrau ai lam hte matut nna naw ra nga ai magam bungli lam shagu hta mung tinang lu ai atsam marai ni hte shang lawm ap nawng gun hpai na matu tsun tawn ai re.
Shaning ninghpaw mungga hta Wunpawng mungdan Shanglawt hpung ginjaw komiti gaw, Wunpawng amyu bawsang ni hta na BGF, Pyithutsit ngu hkap la tawn ai wuhpung ni hpe lapran masha myitsu Du/Salang dat nna, tai hpyen wa a shangun jahpan lagaw lata n tai na matu, teng man ai lam hte amyu sha kahkyin gumdin lam hta rau tsap na matu, mung shawa ni hpe makawp maga ai lam hta rau ta gindun lu na matu lang hte lang zinlum shakut lai wa sai lam hpe mung tsun da ai re.
Dai zawn Zinlum ai lam hpe dai wuhpung hpe woi awn ai ningbaw nkau mi n hkap la ai hta n-ga, majan baw matsun aming shapraw ai lam ni galaw wa ai majaw hpang jahtum hpyen majan zai ladat masing jahkrat nna BGF Pyithutsit ni a dap shara ni hpe zing madu jasan la kau ra ai re lam tsun mat wa ai re.
Matut na mung, amyu sha ni yawng a hpyen madung hku na masat da ai Kani nang hpam pat jasan masing lam hta, mung shawa yawng shang lawm na matu tsun n’gun jaw mat ai hpe mu lu ai re.