Putao hta Lam kaw na malet e htaw wa ai la langai Sengke madu hpe n htu hte kahtam nna, sengke hte Phone, gumhpraw sumbu ni yawng kashun mat wa ya ai nga ginra masha ni kaw na chye lu ai.
December 14 ya shana hkying 9 ten daram hta, Putao Lung Tsawt lawk lusha seng na Kawng kahtawng de wa ai lam hta, malet e lam lapran kaw htaw lang hkrup ai la langai, sengke madu hpe lam lapran nhtu shada sengke jahkring shangun nna, sengke jahkring ya ai hte rau sengke madu hpe kahtam kau da nna, shi kaw lawm ai rai ni yawng hpe kashun la mat wa ya ai nga Putao ginra masha langai KNG shiga dap de tsun dan wa ai re.
“N’htu kahtam katut na Sengke kashun hkrum ai la wa gaw ramma 30 ning ram re sha naw re, Lung Tsawt lusha seng dung ai kaw na shana hkying 9 ram kaw pru wa ai, lam kaw hkawm taw ai La langai hpe mu na htaw lang ai nga yang, lam lapran kaw nhtu hte shagyeng kahtam hkrum wa ai re.” nga tsun dan ai re.
Sengke la kahtam hkrum ai hta, baw kaw kalang shingma maga kalang kahtam da ya nna shi kaw lawm ai Phone hte manu dan ai rai ni yawng kashun la mat wa ya ai re.
Sengke kashun ai Damya la wa gaw, Sengke madu hpe si daw kahtam ai rai tim, n si ai sha hkala sawng ai hte tsi rung du mat wa ai re.
“Shi kahtam hkrum ai majaw, marawn nna, ndai Kawng kahtawng maga de lagat lung wa ai, dai kaw masha yawng jawm majaw na yu yang shi hta ningma sawng ai majaw, kalang dat mung shawa tsi rung de woi mat ai nga,” Kawng Kahtawng na mung shawa langai matut tsun dan wa ai re.
Putao ginra hta Myen hpyen dap daru magam zing kau ai hpang, Kani lu sha ai masha lani hte lani grau grau law wa nna, lagut damya lam ni mung lani hte lani grau grau law wa ai nga ginra masha ni tsun ai re.
