Myen – Miwa Hpaga gunrai ginlen dabang Kanpaiti mare kaba hpe dai hpawt manap hkying 10 chyen ten daram kaw na, KIA hte PDF pawng hpawm dap ni htim gasat taw nga sai re.
KIA pawng hpawm dap maga na Kanpaiti mare hpe dai hpawt maga kaw na htim gasat wa ai hta Myen hpyen dap maga na mung bai ninghkap shingla gasat ai majaw majan laja lana gap gasat hkat wa ai re nga ginra masha ni tsun ai re.
“Htaw yu! laja lana gap gasat hkat taw nga ai, laknak kaba ni ding yang gap shapyen hkat taw nga ai Myo kata wan mung hkru ai nga,” ginra masha langai KNG shiga de tsun dan wa ai re.
Dai na maga de hkying 3 daram hta, pawng hpawm dap maga Kanpaiti mare de shang wa lu sai nga matut tsun dan ai re.
Kanpaiti mare shang ai hpang laknak kaji kaba ni hte matut manoi laja lana gap gasat hkat taw nga ai nga tsun ai re.
Dai na maga de hkying 4 chyen ten du hkra laja lana matut gap gasat hkat taw nga nna, ginra masha ni yawng Miwa hkran maga de hprawng yen taw nga ai lam chye lu ai.
Wa Shawng mare kaw na Sadung mare du hkra hpe dai ning July 11 ya shani htim gasat zing madu wa nna, Chihpwi, Saw Law hpe September 30 ya shani zing madu ngut ai hpang Pang Wa Phimaw mare kaba ni yawng hpe October shata hta htim gasat zing madu ngut ai hpang, ya hpang jahtum ngam da ai Kanpaiti mare kaba hpe dai ni November 20 ya shani kaw na htim gasat taw nga ai re.
Kanpaiti mare kaba hta BGF dap dung 3 na Myen hpyen la ni yawng dai kaw wa majaw rawng nga ai majaw, Kanpaiti kata Myen hpyen n’gun 1000 mi hkawt ram nga na re lam, hpyen masa yu maram ai ni tsun da ai re.
