Myitkyina Manmaw lam kaba n tsa Kung Law mare, hpyen yen mung shawa ni nga ai Hkalup Nawku Jawng wang hta Myen hpyen Jet nbungli the bawm wa jahkrat bun ai majaw, ma kaji marai 9 si nna marai 30 hkawt hkala hkrum wa ai nga ginra masha ni tsun ai re.
November (15)ya shana de 4:00 Pm aten daram hta Myen hpyen gumshem dap nbungli bawm sa jahkrat gasat ai majaw Hpyen yen mung shawa ni si hkala hkrum wa ai re.
Asak si hkrum ai marai(9) re ai hta nta masha nawng rai si ai gaw Slg. Lazum Htang Wa asak (36) ning, Srn Npyen Mun Mai asak (36)ning, kasha Lazum Myu Jat Aawng asak (13) ning, Lazum Sa Ra Seng asak (11) ning, Lazum May Seng Pan asak (7) ning , Lazum Sut Zai Li asak (5) ning ni rai nna Shd. Gawlu Gum Seng Maw asak (9) ning, Shd. Sumlut Mung Htoi Awng asak (11) ning hte shy. Lashi Tsawm San asak (10) ni re hpe chye lu ai.
Hkala hkrum ai marai 30 ram hta, hkala sawng ai marai 7 lawm nna, dai si ai moi mang ni hpe Laiza muklum hta November 16 ya shani makoi mayang sai lam chye lu ai.
Kung Law Nawku Jawng Wang nbungli bawm wa jahkrat ai hta, Nawku Jawng yawng hten mat nna, Ma Shalet jawng hte mawdaw langai mung yawng hten mat ai nga tsun dan ai re.
Kung Law Nawku jawng wang hta wa hprawng yen taw ai hpyen yen mung shawa ni gaw, Nmawk mare na mung shawa ni re lam chye lu ai.
Kung Law mayan hta gasat poi byin ai lam nnga tim Myen hpyen dap maga ya na zawn nbungli bawm jahkrat gasat wa ai rai nga ai.