Wunpawng Mungdan Shanglawt hpung ginjaw Komiti kaw nna, Ru Nu Dan majan masing woi awn komiti hpaw da let, Myen hpyen dap hpe shingla gasat nga
Myen hpyen gumshem dap hkrat sum mat hkra Wunpawng Mungdan Shanglawt hpung ginjaw Komiti gaw, Ru Nu Dan majan masing woi awn komiti hpaw da let, Myen hpyen dap hpe ninghkap shingla gasat nga ai hta, Wunpawng Mungdan Shara law law hpe shalawt da lu wa sai rai nga ai.
Jinghpaw Mungting madang hta, 2024 March shata praw 7 ya shani kaw na htim shagrawt majan masing gap gasat wa ai gaw, ya ten muklum kaba 9 hpe htim shagrawt kau lu sai hta, laga shara law law hpe mung shalawt da lu sai re.
Wunpawng amyusha ni Gumshem Myen hpyen dap hpe rawt malan taw nga ai shaning (60) ning jan du wa sai rai tim, mung shawa ni myit mada ra sharawng ai mung masa pandung de grai n du lu shi ai majaw, ya ten na sat lawat hta, asak aprat ram ai Wa- ngan wa ja ni yawng ndai ahkyak ai atenn laman rawt malan magam bungli hta shang lawm gun hpai sa wa nna, anhte hta nga ai tsam marai ma hkra the ning gun dat shakut sa mat ai rai yang, anhte myit mada ra sharawng ai mung masa pandung de du wa lu sana re lam, (64) Ning hpring KIO masat n htoi mungga hta tsun da ai re.
“Anhte a Shanglawt rawt malan hkrun lam aten ladaw shaning (60) ning jan mat sai rai tim anhte myit mada ra sharawng ai mung masa pandung de grai n du lu nga ga ai. ya aten na masa sat lawat gaw, anhte hta nga ai atsam marai ma hkra hte ning-gun dat la ra ai aten rai nga sai, dai majaw asak aprat ram ai wa-ngan waja ni yawng ndai ahkyak ai aten ladaw laman rawt malan magam bungli hta shang lawm gun hpai sa wa ga nga,” tsun da ai re.
KIO gaw hpyen gumshem lailen hkoi tsai mat hkra ninghkap gasat nga ai Wuhpung Wuhpawng ni the lata gindun sa wa na matu dawdan da ai the maren, matut hkrang shapraw sa wa na re lam tsun ai re.
Ya ten dai shalawt da ai gai wang ni hta magam gun na matu, Asak prat ram ai ramma ni grai ra ahkyak taw nga ai lam chye lu ai re.
Wunpawng Mungdan Shanglawt Hpung (KIO) ngu ai Rawt Malan ai mung masa hpung hpe Lahta sammung, Sinli mare, Duwa Gauri Zau Yaw a nta kaw Jinghpaw Wunpawng amyu sha hte mungdan lawt lu na matu yaw shada let, 1960 ning, October shata (25) ya Shani tara shang hpaw hpang wa ai rai nga ai.
