Zahkung Ting Ying woi awn ai NDAK Ginjaw shara Pang Wa mare yawng hpe KIA maga yawng jasan jaseng galaw kau lu sai lam, Ginra masha ni kaw na chye lu ai.
Pang Wa mare kaba hpe KIA hte pawng hpawm dap maga October 18 ya shana hkying 10 ram hta yawng gap gasat zing madu kau lu sai nga, Dukaba Nhpang Naw Bu KNG shiga dap de tsun ai re.
“ Dai hpawt hkying 6 hte hkying 8 lapran kaw yawng jasan jaseng galaw taw nga ai nga na na lu ai, ndai masa hpe yu yang gaw, yawng asan rai sai ga rai nga ai,” nga tsun ai re.
Pangwa mare hpe October 18 ya shana hkying 5 daram kaw na Byuha dap hpe htim gasat hpang wa ai gaw, hkying hkum 6 na ai hpang, shana hkying 10 ten lu gasat zing kau ai rai nga ai.
Pangwa mare hpe hkying hkum 6 daram sha htim gasat wa ra ai rai nna, law malawng gaw hpyen hking kaw na, mung shawa hking galai kau nna, yawng hprawng mat ai majaw, Pangwa majan hpe jahkring sha hte gasat zing kau lu ai re nga ginra masha ni tsun ai re.
Pangwa mare hpe rai n gasat shi ai ten, Pangwa mare hpe madung shim lam la ya nga ai Lupyi mare na masat (1002) hpe shawng htim gasat zing kau ai hpang Pangwa mare hpe bai htim gasat zing madu wa ai rai nga ai.
Pangwa mare hpe htim gasat zing madu kau ai hpang Miwa maga de na, ginjaw ginra mayan na jarit chyinghka yawng pat kau ai re
