Pang Wa lam maga de majan matut byin nga nna, Myen hpyen dap nbungli Y-12 the bawm wa jahkrat bun nga.
Chihpwi hte Pang Wa lapran Lang Jaw mare makau du nga ai KIA hpyen hpung ni hpe Myen hpyen dap maga October praw 6 ya shana yup tung ten, Y-12 nbungli the bawm wa jahkrat bun ai lam shawng lam hpyen shi sawk the ni nawn ai ni tsun ai re.
Dai n bungli the bawm wa jahkrat bun ai hta si hkala ai lam the seng na a tsawm tup hkrak n chye lu ai re.
Ndai laman Pang Wa maga de KIA dap hte Zahkung Ting Ying woi awn ai hpyen hpung ni hte shani shagu hpyen masa shaja hkat taw nga nna, Zahkung Ting Ying woi awn ai BGF the Pyithutsit, Myen hpyen hpung ni pawng hpawm nna, hpyen n’gun kaba the hkap shingla gasat taw nga ai lam shawng lam hpyen shi sawk ni kaw na chye lu ai.
Pyithutsit dap maga na mung, myen hpyen dap BGF ni yawng hpyen n’gun pawng mahkawng nna, Drone hpan hkum lang nna, hkap shingla gasat taw ai majaw majan shani shagu laja taw nga ai lam matut chye lu ai.
October praw 3 ya shani Chihpwi hte Pang Wa mare lapran na Deng 11 shagyit hpe htim gasat zing madu kau ai hpang Pang Wa lam maga de shani shagu gasat majan ni matut byin taw nga nna, Myen hpyen dap maga na mung nbungli hpan hkum hte wa gap bun taw nga ai re.
Yaten Zahkung Ting Ying a ginra na bungli dabang ni yawng hpe hpyen masa a majaw gan jahkring da shangun ai lam ginra masha ni kaw na chye lu ai.
