Jinghpaw Mung Sinpraw Dingdung maga Sawlaw mare Myen hpyen dap (Hk. L. Y 298) dap hpe KIA htim gasat zing madu kau lu sai lam shawng lam hpyen shi sawk ni KNG de tsun ai re
KIA pawng hpawm dap maga na, Saw law( HK L Y 298) dap hpe September 29 ya shani kaw na htim gasat hpang wa ai gaw, dai ni October praw 2 ya jahpawt hkying 7 chyen ten hta yawng zep zi htim gasat zing kau lu sai lam shawng lam hpyen shi sawk ni tsun ai re.
“Saw Law hpe gaw nhtoi 4 ya gasat ai ga rai nga ai, dai hpawt hkying 7 chyen kaw yawwng gasat zing kau lu sai, Saw Law ginra yawng lu zing sai ga rai nga ai. Myen hpyen dap n nga sai.” nga tsun dan ai re.
Saw Law majan hta Myen hpyen dap maga si hkala law wa nna, laknak machyu pala alaw alam lu zing madu wa hpe matut chye lu ai.
Ya KIA htim gasat zing kau ai Myen hpyen dap HK. L. Y 298 dap gaw Saw Law ginwang yawng hpe shim lam jaw taw ai dap shara re lam chye lu ai.
Lai wa sai March shata kaw na Saw Law ginra hta KIA dap maga htim gasat hpang wa ai gaw, April shata hta,Pyithutsit dap shara 3 hpe htim gasat zing madu kau lu wa ai re.
April 11 ya shani hta mung Saw Law mare sa lam Myawmaw Pyithutsit dap shara hte Myaw Zang Ku jarit sin dap shara ni hpe htim gasat zing la lu wa ai re.
April 16 ya shani du hkra rai yang dai ginra na dap shara yawm dik 5 daram hpe htim gasat la lu wa nna, shata 6 na ai hpang Saw Law Myen hpyen dap kaba hpe bai zing madu la lu wa ai rai nga ai.
Dai majaw ya ten Saw Law ginra gaw Myen hpyen dap, jarit sin dap, Pyithutsit dap ni yawng hpe htim gasat kau lu sai rai nga ai.
Saw Law mare hpe rai n zing shi yang September 29, 30 ya shani, Chihpwi mare hpe shawng htim gasat zing madu la lu wa ai re.