Myitkyina-Manmaw lam mayan KIO uphkang ginra ni hta bus mawdaw hkawm hpang nga sai lam KIO asuya kaw na chye lu ai.
Ya na zawn bus mawdaw gau hkang ai lam gaw KIO asuya maga mungchying mungshawa hte hpyen yen ni a matu yaw shada ai lam re lam, KIO shiga dap lit hkam Dukaba Nhpang Naw Bu KNG hpe tsun ai.
“mung shawa ni mung tinang a buga de bai nlu wa shi ai le raitim yi sun hkauna ni gaw tinang buga de galaw sha na nga ai re nga. dai ni hkawm sa hkawm wa ni hpe e KIO asuya hku nna dang lu ai daram madi shadaw ya na ngu ai ဝန်ဆောင်မှု langai mi hpe yaw shada let ndai bus car ni hpe galaw ya ai re nga” tsun ai.
Bai nna bus mawdaw manu hkyem sa ai majaw mung chying mung sawa ni sha n ga, KIO magam gun ni yawng mung mawdaw manu jaw let jawn ra na lam, KIO asuya ndau da ai re.
Bus mawdaw gau hkang ai hpe September 2 ya shani kaw nna hpang taw sai rai nna, Laiza- Myitkyina sa lam mayan Gangdau Yang du hkra, kyat 2500, Gara Yang du hkra kyat 5000 ,
Laiza- Manmaw sa lam mayen Daw Hpum Yang mare du hkra kyat 2500, Myotit du hkra Kyat 5000 jaw ra ai lam KIO ndau da ai re.
Dai sha n ga mam, n gu, shapre, shakau, chying nam, shingnam hte yangyi zawn re li ai baw buri langai mi kaw kyat 2,000 rai nna (Sau) n tsin hpan (25) liters pung langai kaw kyat 1000,Nam maw Nam Lap buri (1) kaw 500 ang ai lam chye lu ai.
Ya na zawn manu hkyem sa ai hku bus mawdaw gau hkang ya ai majaw mung sawa ni hkawm sa hkawm wa grau loi wa nga Laiza na Amyu shayi langai ya na zawn tsun ai.
“Ya ten gaw lam jarit ni grai hpu ai le tinang gaw sengke nnga mawdaw nnga hkawm sa na mung yak bai shap na nga yang mung nloi ya na zawn bus mawdaw ni galaw ya ai majaw yawng gaw grai kabu taw ma ai re nga“ nga nna shi gaw tsun ai.
Shawoi hkan Laiza-Myitkyina du hkra wa wa sa sa re yang kyat sen 6 daram hkrat ai raitim ya na zawn Laiza-Myitkyina mayan bus mawdaw gau hkang ya ai majaw, hkawm sa hkawm wa manu grau hkyem sa mat sai re.
Mawdaw gauhkang ai aten gaw jahpaw hking7:30 hta gaw Gara Yang the shana daw hking1 hta gaw Myotit mare maga de gau hkang nga ai rai nna, dai shara nig aw shimlam nga ai shara re lam du kaba Nhpang Naw Bu gaw tsun ai.
