Seng Tawng Balik Dap Rung Hpe Drone hte Sa Gap Bun Ai Hta Myen Balik Dukaba hte Hpawn Marai 10 Si nna, Marai 6 Hkala Hkrum
Hpakant Seng Tawng Balik dap hpe KIA hte KPDF dap ni kaw na drone hte bawm sa jahkrat bun ai hta, Myen hpyen dap up hte hpawn hpyen la marai 10 jan si hkrum wa ai nga, hpyen dap ni hte ni nawn ai ni tsun ai re.
June 26 ya jahpawt, Myen hpyen balik dap hta zuphpawng galaw nga ai hpe KPDF dap maga drone hte bawm sa jahkrat bun ai hta, Myen hpyen dap maga du kaba hte hpawn,marai 10 asak si sum wa nna, marai 6 hkala sawng wa ai nga tsun ai re.
Dai si hkala ai ni hpe leng 12 mawdaw kaba hte Hpakant mung shawa tsi rung de htaw mat wa ai re lam Seng Tawng ginra masha ni tsun ai re.
“Mani hpawt Balik rung hta zuphpawng galaw masha majaw nga ai hpe Drone hte sa gap bun ai tsawm ra masan sa ai, dai kaw balik du kaba ni yawng lawm mat ai, ဒုရဲမှူးကြီး၊ ဒုရဲမှူး hte laga balik marai 10 si nna, marai 6 hkala sawng ai,” nga tsun dan ai re.
Seng Tawng mare hta June 27 dai na maga hkying 4 daram hta mung, Hpyen shamu shamawt hkawm taw nga ai Myen hpyen hpung hpe KIA dap maga drone hte hkap shingla gasat dat ai lam chye lu ai.
Dai zawn drone hte hkap shingla gasat ai hta, Myen hpyen dap maga si hkala sum machyi lam nga wa ai majaw, makau grup yin de myen hpyen dap sinat kaji kaba gap shadam bun wa ai re.
June 26 ya shani hta, Myen hpyen dap maga ya na zawn si hkala law wa ai majaw, Hpakant Myen hpyen byuha dap kaw na, Seng Tawng mare de lakbak kaba 10 jan lang gap shadam bun wa ai re.
Myen hpyen dap maga na dai zawn laknak kaba gap shadam bun wa ai hta, စိန်မြသုခ gawdin pa hta wa hkrat ai kaw, mung shawa marai (5) hkala hkrum wa nna,Hpawmi ကြည်ကြည် nta kaw wa hkrat ai hta,mung shawa marai (4) hkala hkrum wa nna, Seng Tawng Yang mare hta wa hkrat ai hta Marai (1) hkala hkrum wa ai re.
Seng Tawng mare mung shawa dum nta,wa hkrat ang ai laknak kaba 4 rai nna, dai wa hkrat ai hta yawng pawng,marai 11 hkala ai hta (1) gaw hkala sawng wa ai re.
Matut na rai tim,Maw Shan mare, Jinghpaw labu dut ai seng kaw wa hkrat ai hta, marai (1) hkala hkrum wa nna, Ngwi pyaw lawk Hpawmi မိုးဦး a gunrai dum kaw wa hkrat ang ai hta mung, marai (1) hkala hkrum wa ai rai nga ai.
Myen hpyen dap maga ya na zawn mung shawa ni nga ai shara de,yaw shada lam nga nga hte laknak kaba gap shadam bun ai majaw, mung shawa hkala law wa ai rai nga ai.
Ndai laman Hpakant hta Myen hpyen dap hpyen shamu shamawt hkawm wa ai hpe KIA, KPDF dap kaw na drone hte hkap shingla gasat ai hta Myen hpyen dap maga sum machyi lam ni nga taw ai majaw, Myen hpyen dap maga ya na zawn, laknak kaba hkrup mara gap shadam bun nna, mung shawa dum nta,hkru hten hkrum taw nga ai rai nga ai.
