Putao mare kaba hta mani June 24 ya shani kaw na Phone Internet bai lu sai taw sai lam Putao ginra masha ni tsun ai re.
Putao hta Phone Internet line shata mi jan pat mat ai rai nna, mani kaw na shawoi na zawn ding run bai mai lang taw nga sai nga, Putao ginra masha langai KNG shiga dap de tsun dan wa ai re.
“Line ni yawng bai lu taw sai, 4G bai lu sai Mytel chyawm gaw rai n lu shi ai, ngam ai yawng lu sai, galoi du hkra a tsawm mai lang na ngu hpe chyawm n chye ai, ya ten gaw kaja taw nga ai.” nga tsun ai.
Mytel hta lai nna, laga Ooredoo, Teleno, MPT yawng shawoi na zawn bai mai lang taw nga sai rai nna, Internet 4G hte mai lang taw sai nga matut tsun dan wa ai re.
Putao Myitkyina Mawdaw lam kaba pat kau ai shata lahkawng na ai hpang, jak sau yak hkak mat ai majaw, Phone shadaw ni wan n lu mat na pat kau ra ai kaw na, Phone Internet line yawng pat mat ai rai nga ai.
Ya ten Putao de jak sau ni bai du wa sai majaw, Phone Tower ni yawng bai gawng kri lu sai majaw, shawoi na hte hkrak a tsawm sha bai lang mai taw sai nga tsun ai re.
Putao hta jak sau dum hprut mat ai majaw, MPT hte Mytel phone line ni April shata ram kaw na line mat mat ai rai nna, Teleno hte Ooredo gaw May shata praw kaw na line yawng mat mat ai re lam chye lu ai.
Shata masum jan Myitkyina Putao lam pat mat ai rai nna, ndai laman kaw na shawoi na zawn sau seng kaba ni matut hpaw taw nga sai lam chye lu ai.
Sumprabum Myen hpyen dap hpe KIA dap htim gasat zing madu kau ai hpang dai ginra hta majan byin ai lam n nga mat sai rai tim, kata lam hpyen masa shaja hkat ai lam ni matut nga taw ai nga ginra masha ni tsun ai re.
