Manje Hpyen N-gun Laknak Malu Masha Htaw Sa Wa ai Myen Hpyen Hpung Hpe KIA Hkap Htim Gasat Ai Majaw Majan Laja Nga
Manje maga de hpyen n-gun laknak malu masha htaw sa wa ai Myen hpyen hpung ni hpe Manmaw Kawng Ja yang kaw KIA dap maga dai hpawt manap hkying 7 daram hkap shingla gasat ai kaw na majan laja lana gap gasat hkat taw nga ai lam shawng lam hpyen shi sawk ni shana wa ai kaw na chye lu ai.
Manmaw kaw na Manje maga de hpyen laknak machyu pala hte malu masha ni hpe hpri gang mawdaw lahkawng hte shim la la ya nna, htaw sa wa ai hpe KIA dap maga hkap shingla gasat ai kaw na majan byin taw ai re lam tsun ai.
Manje Myen hpyen dap Hk.M.Y (319) hte (601) dap de, laknak machyu pala hte malu masha dumhprut wa ai majaw, Manmaw maga de na hpyen n gun hte malu masha htaw sa wa ai ni hpe hkap shingla gasat ai re nga ginra masha langai KNG de n dai zawn tsun ai re.
“Manje de majan byin ai shata mi hkawt na wa ai re nga yang lak nak machyu pala ma wa ai she n rai i? Hpri Tank mawdaw lahkawng hte shim lam la ya nna sa wa ai dai hpyen hpung ni hpe hkap shingla gasat ai kaw na majan byin taw nga ai.” nga tsun ai.
Dai Myen hpyen hpung ni hte mani hpawt June 11 ya jahpawt kaw na gap gasat hkat taw nga ai rai nna, ya ten du hkra majan matut laja taw nga ai nga tsun ai re.
Manje mare hta May praw 7 ya shani kaw na htim gasat hpang wa ai gaw, dai ni ten du hkra majan matut byin nga nna, Myen hpyen dap maga na lakna malu masha dumhprut wa ai masa a majaw, Tank mawdaw 2, mawdaw kaba 3 hte lung wa ai re lam chye lu ai.
Ya ten Nmawk hte Manje Majan gan zim taw nga ai masa rai nna, shada lahkawng maga hpyen masa matut shaja hkat taw nga ai re.
