Langu Htaw Mawdaw Kaji Lai Taw Ai Majaw Lam Mahkrai Hten Na Ginra Masha Ni Myit Tsang
Hkat Cho mare hta Myen hpyen dap hte KIA dap lahkawng maga na, Mawdaw lam kaba pat da ai majaw, dai ginra na langu si ni hpe mawdaw kaji hte laga lam kaji hku na htaw shalai taw nga ai majaw, lam mahkrai hten ai lam ni byin hkrum taw nga ai nga, dai ginra na mung shawa ni tsun ai re.
Lai wa sai ten dai ginra na Langu si ni hpe, mawdaw kaba (တွဲကား) ni hte htaw ai rai tim, n dai laman Myen hpyen dap hte KIA dap lahkawng maga na langu htaw mawdaw kaba ni hpe n shang shangun mat ai majaw, dai ginra na langu si ni hpe Tung Fung mawdaw kaji ni hte laga mare lam kaji hku na htaw shalai la taw nga ai lam chye lu ai.
Ya na zawn gat dara lam hku na n re sha mare kata n lung lam hku na shani shana langu si htaw shalai taw nga ai majaw, dai mare kata na lam kaji ni hten hkrum taw nga ai hte, mare masha ni byin mai ai hku na hkrai da ai mahkrai kaji ni hten mat na hpe ginra masha ni myit tsang ai lam, dai ginra na mung shawa langai KNG shiga dap de tsun dan wa ai re.
“Ya gaw Hkat Cho Mawdaw lam kaba pat da ai, ya mawdaw law malawng gaw ndai Mukloi lam kaji hku na sha lai taw nga ai, dai ram law ai mawdaw shani shana lai taw nga yang gaw mahkrai gade n hkam na re, ngut na lam ni mung yawng hten na sha rai nga ai,” nga tsun ai.
Langu htaw mawdaw kaba ni gaw, Waimaw lam kaba hta tsap nga nna, Dalaw, Jamga, Hkat Cho maga de na langu si ni hpe mukloi mare lam kaji hku na Waimaw du hkra wa htaw sa taw nga ai re.
Ya langu si htaw shalai taw nga ai lam mayan hta mahkrai lahkawng nga ai rai nna, langu htaw mawdaw ma hkra gaw, dai mahkrai hku na sha lai taw nga ai majaw, mahkrai daw hten mat na hpe ginra masha ni myit tsang taw nga ai re.
Dai ginra de May 18 ya shani kaw na, Majan laja lana htim gasat hkat wa ai hpang, KIA dap maga shara la kau ai hpang, ya na zawn lam kaba hpe pat kau ya ai rai nga ai.
Ya ten dai ginra ni hta Myen hpyen dap hte KIA dap lapran hpyen masa shaja hkat taw nga ai majaw, langu htaw mawdaw n mai lai mat nna, Langu sun galaw ai ni langu myin lai mat nna, arang sum hkrum na hpe myit tsang nga ma ai re.
