Miwa Mung Shinghkawng Jarit Lam Hku Na Htaw Shalai Ai Jak Sau Hpe Myen Hpyen Dap Hkawn Kang Hta Ai Majaw Mi Na Manu Hta Yawm Ai Lam N-nga
Putao ginra hta ra gadawn nga ai jak sau hpe Miwa Mung kaw na Shing Hkawng jarit lam hku htaw shalai na ahkang lu sai rai tim, Myen hpyen dap hte Pyithutsit dap ni kaw na, hkawn kang hta nga ai majaw, jaksau manu matut tsaw rawt taw nga ai lam ginra masha ni tsun ai re.
Myitkyina Putao lam pat tawn ai shata 3 hkawt na wa ai hpang, Putao ginra hta dumhprut taw nga ai Jak sau hpan mi hpe sha, Miwa mung kaw na htaw shalai na ahkang lu ai rai nna, dai htaw shalai wa ai lam hta Myen hpyen dap hte Pyithutsit dap ni kaw na, Ri Dam hkrai noi hte Magwi Za shagyit ni hta hkawn kang ladu lai hkap hta taw ai majaw, jak sau manu mi na zawn matut tsaw rawt taw nga ai nga, Putao mare na mung shawa langai KNG de tsun dan wa ai re.
“Jak sau gaw shang ai, Shing Hkawng maga de na, rai tim mung Magwi Za hte Zira Dam gate kaw Pyithutsit hte Myen hpyen dap ni pawng na gumhpraw hta sha taw ai, dai majaw, sau tau mi Mun 2 hte dut ra na hpe Mun 6 hte dut taw nga ai, mi na hte hpa n shai ai,” nga tsun ai re.
Putao ginra hta ya ten jak sau galan 6 shang ai pung langai sen 8 nga ai rai nna, dai pung langai hpe Myen hpyen dap hte Pyithutsit gate shara lahkawng hta sen masum hkap hta ai lam chye lu ai.
Putao mare hta ra gadawn nga ai jak sau ni hpe Miwa mung jarit masat shadaw (31) kaw na Shing Hkawng, Nyi Wah mare du hkra Mawdaw Sengke hte wa htaw sa da nna, Nyi Wah mare kaw na Naw Mung mare du hkra gumra hte htaw la nna, Naw Mung kaw na Putao de mawdaw hte bai htaw la ai re nga ginra masha ni tsun ai re.
Dai ginra hta lama Myen hpyen dap gate n nga ai rai yang, Mawdaw seng ke htaw manu hte gumra htaw manu ni hpe shaw kau yang, dai jaksau tau mi hpe Putao hta manu 20,000 hte dut jaw mai ai lam tsun ai re.
Myen hpyen dap ni kaw na ya na zawn hkawn kang hpe hkrup mara kam ai hku hkap hta taw nga ai majaw, ya ten Putao hta jaksau tau mi yawm dik 60,000 hte mari lang ra taw nga ai re.
Ridam hkrai noi shagyit gaw, Shing Hkawng hte Naw Mung lapran hta nga ai rai nna, Kasan hka mahkrai Magwi Za hkrai noi shagyit gaw, Naw Mung hte Putao mare lapran nga ai re lam chye lu ai.
Miwa mung maga de na jak sau htaw shalai ai lam hpe lai wa sai shata kaw na htaw la na matu hkyen ai rai tim, Myen hpyen dap maga ahkang n jaw ai kaw na, ndai laman ahkang jaw wa ai rai tim, Myen hpyen dap maga na ya na zawn hkawn kang hta ai majaw, ginra masha ni matut yak hkak hkrum taw nga ai re.
