Hka Maw ru hkrum ai Chihpwi Myaw Maw Pa mare na mung shawa ni ya ten hkyak hkyak garum ningtum ra taw nga ai lam ginra masha ni tsun ai re.
May 29 ya jahpawt jau marang kaba htu nna, hka maw ru ru wa ai majaw, dai mare na nta hting gaw 10 jan yawng gun mat wa ya nna, laga ngam ai dum nta 30 daram mung hten hkrum wa ai re.
Ya ten dai dum nta n lu mat sai mung mare masha ni lam shagu hta yak hkak jam jau hkrum nga ai lam, dai ginra na mung shawa langai KNG shiga dap de ndai zawn tsun dan ai re.
“Ya gaw mai byin ai hku jinghku jingyu n’ta hkan machyu taw nga ai, ya gaw gan rawng mai na Muga ginsum nta gap na hku hkyen nga ai, rai tim muga nlu ai, ngut na malu masha mung grai yak taw nga ai, garum ningtum grai ra taw nga ai,” nga tsun dan ai re.
Ya ten dai Myaw Maw Pa mare na dum nta n lu mat sai mung mare masha ni, tinang chye ai jinghku jingyu ni hte nawku jawng shara ni hkan machyu shingbyi nga ai rai tim, malu masha hte rawng na dum n ta gaw gap la na hta yak hkak hkrum taw nga ai rai nga ai.
Dai Hka Mawru hta, amyu shayi langai yawng si nna, ma kaji langai mung yawng lawm mat ai kaw na bai lawt wa ai re.
Dai hka maw ru ru wa ai hta, Mawmaw Pa mare na dum nta 40 daram hkra hten wa ai hta, n ta 10 daram gaw hka de yawng, yawng lawm mat wa nna, hpa mung n lu la mat ai lam chye lu ai.
Hka maw ru hkrum ai hpang, dai ginra na mung mare masha ni hka n san n seng ai hpe sha jai lang taw nga ra ai majaw, hkam ja lam ni hta mung ahtu hkra wa taw ai majaw, tsi mawan garum ningtum lam ni mung gadawn taw nga ai re.
Hka hpyen hkrum ai mung mare masha ni hpe mai byin dang di ai daram garum la na matu dai ginra na mung mare masha ni myit mada nga ma ai re.
Ya ten Myitkyina hte Chihpwi lapran, laknak lang wuhpung shagyit 11 daram nga ai rai nna, dai shagyit ni hta ladu lai san jep ai lam ni nga taw ai majaw, dai de sa du garum na lam hta mung yak hkak ai lam nga taw ai re.
Myaw Maw Pa mare hta nta hting gaw 80 daram masha 300 hkawt nga ai mare kahtawng langai re lam chye lu ai.
Dai hka maw ru hta Zang Nau Yang mare na dum nta 9 mung hkra hten wa ai lam chye lu ai.
Ya hka hpyen hkrum ai mare kahtawng ni gaw, Nmai hka a sinna maga KIA Uphkang ginra ni re lam chye lu ai.
