Hpyen Masa Shaja Hkat Taw Nga Ai Waimaw Mare Hta Hkrit Tsang Myit Hte Jawng Hpaw Sharin Nga
Waimaw Ginwang kata Hpaji jawng ni hpe hpaw sharin taw sai rai tim, Majan masa lam a majaw, hkrit tsang let, hpaw sharin taw nga ra ai lam, jawng ma kanu kawa ni tsun ai re.
Waimaw muklum kata na hpaji jawng ni hta, May 28 ya shani kaw na jawng mying hkap la nna, June praw 3 ndai bat langai ya shani kaw na, jawng laika hpaji ni hpe hpaw sharin taw nga sai lam chye lu ai.
Ya na zawn Jawng laika ni hpaw sharin taw sai rai tim, dai ginra ni hta hpyen masa matut shaja hkat taw nga ai zawn, Myen hpyen dap maga na shana shagu laknak kaba gap shadam bun nga ai majaw, mung mare masha ni hkrit myit ni hte nga taw ai nga, dai ginra na amyu shayi langai KNG shiga dap de tsun dan wa ai re.
“Mung shawa yawng gaw hkrit let nga taw ai ga rai nga ai, yawng gaw ma ni a hpaji masa lam hpe myit nna, shakut bang da ai hkrai rai nga ai, bang da tim mung maga mi de majan byin wa na hpe ten tup maja taw nga ra ai,” nga tsun ai re.
Ya ten Waimaw muklum kata na hpaji jawng ni yawng hpe hpaw sharin taw nga ai rai tim, mung shawa law malawng hpyen yen, yen hkawm taw nga ai majaw, shawoi na zawn jawng ma n law ai lam chye lu ai.
Waimaw makau grup yin na mare kahtawng ni rai nga ai, Wuyan, Labang, Lamyang, Mukchyik, Nam Wah mare hte laga mare kahtawng hkan na mung mare masha yawng mung ya ten tinang man ang ai de hprawng yen taw nga ai majaw, jawng ma ni jawng lu lung na matu yak hkak hkrum taw nga ai re.
