Loi Je Muklum hpe Mare Shim Lum Lam hte Kani Nang Hpam Pat Jasan lam ni hpe Madung Galaw Sa Wa Na Lam KIO Tsun

Loije Muklum hpe KIA htim gasat zing kau ai hpang, ya ten dai ginra hta KIO uphkang sai ru jahkrat taw nga sai hta, ndai laman mung shawa ni hte hkrum zup ai lamang hpe hkan galaw wa ai lam chye lu ai.

KIO Uphkang Salang Kaba ni hku na Loije Muklum kata nga ai mung mare masha ni hpe June praw 3 ya shani kaw na praw 5 ya shani du hkra lawk hte lawk hkan galaw wa nna, mung mare masha ni hte ni ni htep htep hkan hkrum shaga wa ai nga dai ginra na mung shawa langai KNG de tsun dan ai re.

“KIO Uphkang Salang Kaba ni kaw na mare lawk de hkan du gawan hkawm let, yawng hte hkan hkrum shaga wa ai ga rai nga ai, ndai zawn hkan hkrum shaga ai gaw shawng ningnan lang rai sai ga rai nga ai, madung gaw shan hte galaw sa mat wa na lam, mung shawa ni hpa ra ahkyak nga ai lam ni hpe hkan jahta ai lam ngu na mu mada ai.” nga tsun ai re.

Ya na zawn mung mare masha ni hte hkan hkrum shaga ai hta, Muklum shim lam, Kani Nanghpam pat jasan lam ni hpe madung galaw sa wa na re nga tsun sang lang mat wa ai re.

Loije muklum uphkang hpung hta, lai wa sai ten na uphkang salang ni langai mung nlawm mat sai rai nna, KIO maga de na lata san da ai salang ni hkrai san rai mat sai hte, dai ginra na mung shawa shim lum lam, galaw lu galaw sha lam, nga mu nga mai lam, kani nang hpam pat jasan lam, muklum san seng lam ni hpe madung galaw sa wa na re nga tsun sang lang mat ai lam ginra masha ni KNG shiga dap de matut tsun ai re.

KIO Uphkang asuya lung wa ai hpang, Loije muklum kata na shaning 10 ning jan na sai maza sum pum ni hpe n dai shata lahkawng laman jasan jaseng kau lu ai rai nna, ya ten muklum kata san seng lam hte seng na masat da ai maza sumpum ni hta kabai na lam tsun sadi jaw ai lam ni galaw nga ai re.

Matut nna mung, Loije muklum ting hta mung shawa ni a shim lum lam a matu madang tsaw CCTV ni shakap mat wa na rai nna, dai hte a tsawm sha gawn hkang sa mat na re lam matut chye lu ai.

Majan ten laman hprawng yen hkawm mat ai Loije mare mung shawa yawng mung, ya ten tinang dum nta hta a tsawm bai wa nga taw sai rai nna, shawoi na zawn galaw lu galaw sha taw nga sai re.

Maga mi de Myen hpyen dap hpe matut htim gasat taw nga ai majaw, hkawm sa hkawm wa lam hta matut yak hkak taw nga ai majaw, jarit gunrai hpaga ginlen lam hpe a tsawm rai n lu hpaw shi ai re.

Nmawk Loije Lam hpaw ai hpang she dai ginra hta hpaga gun rai ginlen ai lam hpe a tsawm galaw sa wa lu na re lam matut chye lu ai.

Loije Muklum hpe Myen hpyen dap maga April praw 8 ya shana hprawng shakram kau da ai hpang, dai ginra yawng hpe KIO maga up madu kau lu sai re.