Mungmyit Sinli, Kutkai Ginwang, Daknai mare hta May 30 ya shana hkying 3 daram hta lai wa ai mawdaw 4 hpe KIA dap maga na lit nga ai ni hkap jep ai hta, Kani hpraw, Yama hte laga Ja gumhpraw ni hpe hkap mu rim ai lam, dai ginra na mung shawa ni kaw na chye lu ai.
Dai shana de Daknai mare de shang wa ai mawdaw 4 hpe hkap jep ai hta, Kani hpraw Kilo 31 chyen, Yama tsi hkyep tawng 427,000 the hpawn Miwa Gumhpraw, Myen Gumhpraw, Ja rai, Lung Seng ni hte kaga arung arai ni hpe hkap mu rim ai re lam chye lu ai.
Dai mawdaw hpe hkap lu rim ai hpang, kaga shara ni de matut sawk jep hkawm mat wa ai ten, Miwa num langai a nta hta Ja, Lung Seng, hte Kani hpraw, Yama sumpum mi hpe bai sa mu jep ai lam tsun dan wa ai re.
Ndai kalang mu jep rim ai hta, Kani hpraw Kilo 31 chyen, Yama si hkyep tawng 427,000, Ja kachyi 4, ja ta lahkawn 3, ja ta chyawp 11, ja na tan 15, Magri lahkawn 1, gumhpraw lahkawn 1, Lung seng lahkawn 4, Padi lung seng kachyi 18, Lung Seng tawng Kaba 32, Lung seng tawng kaji 2, Modo Sub 2, Toyota wakang 1 hte myu hpam nchye Modo 1, Nayi 2, Miwa gumhpraw 27,405 hte Myen Gumhpraw 44,077,500 Ks ni hpe rim la lu wa ai re nga n dau da ai re.
Kani Nanghpam hte arau Slg Nay Min Oo asak (38) ning hte Slg Hpau Chan asak (68) ning ni hpe rim ahkyak la da ai lam matut na chye lu ai.
Mungmyit Sinli ginra hta, laknak lang wuhpung law ai hte rau, kani nang hpam dut mari ai ni mung law ai lam ginra masha ni tsun ai re.
Ya na zawn ginra Patjasan hpung ni hte KIA dap maga Kani nang hpam lu rim ai n dai kalang law dik re lam matut chye lu ai.
