Shwenyaung Pin Kaw Na Pru Wa Ai Mung Shawa Ni Hpe Myen Hpyen Dap Hkap Gap
Shwenyaung Pin hte Gara Yang mare lapran Bribra mare kaw bungli galaw sha taw nga ai mung shawa ni pru wa ai hpe Myen hpyen dap ni kaw na, Hka Shi mare lai, Waimaw mare numshang hta hkap gap gasat ai majaw, dai kaw lawm wa ai mung shawa n kau hkala hkrum wa ai lam chye lu ai.
May 26 ya shana hkying 10 daram hta, Shwe Nyaung Pin maga de na bungli galaw masha ni wa ai mawdaw hpe, Myen hpyen dap kaw na hkap gap ai majaw, si hkala hkrum ai lam ni byin wa ai nga, shawng lam magam gun hte ni nawn ai ni tsun ai re.
“Mana Shwenyaung Pin de na mawdaw hpe anhte maga na ni shalai dat ai, shan hte tsun yang gaw lahta ntsa na ni hte jahkrup da na pru wa ai re nga, kaning hku mi byin ma ai kun? dai kaw tsawm ra mi gap dum bre hkat ma ai.” nga tsun ai.
Dai hkap gap gasat hkrum ai mung shawa ni yawng hpe Washawng Hpungkyi Saradaw hte PCG ni lapran salang tai ya let, sa woi shaw la nna, Waimaw mung shawa tsi rung hta tsi tsi hkam la taw sai lam chye lu ai.
Dai hkala hkrum ai hta, La marai 1 si nna, marai 8 hkala sawng wa nna, laga ngam ai marai 18 gaw loi li hkra machyi ai lam ni nga wa ai re.
Ya pru wa ai bungli galaw masha ni gaw, Shwenyaung Pin hte Gara Yang mara lapran hta ja htu, langu sun hkan n chyang chyang sha taw ai bungli galaw masha ni rai nna, Shwenyaung pin hta majan byin wa ai majaw, KIA dap maga woi lakawn da ai rai nga ai.
Ya na zawn bat mi jan woi lakawn da ai hpang, sinat mahku n sen loi zim sai majaw, Waimaw de shalai dat ai ten, Myen hpyen dap maga de na ya na zawn hkap gap gasat wa ai rai nga ai.
Dai mung shawa marai 100 jan pru wa ai hta, langu htaw mawdaw kaba langai, Hijet mawdaw langai, သုံးဘီး langai, yu maya mawdaw langai hte lai pru wa ai ten, Waimaw mare numshang hta hkap gap hkrum ai rai nga ai.
Mung shawa jawn mawdaw hpe hkap gap gasat ai hpang, Myen hpyen dap ni, shana ting dai makau grup yin ni de laknak kaba gap shadam bun wa ai re.
Ya ten Waimaw ginra makau grup yin ni hta majan gap gasat ai lam ni n nga ai rai tim, Myen hpyen dap maga na shana ting ting laknak kaba ni hkrup mara gap shadam bun taw nga ai lam chye lu ai.
