Myitkyina Tang Hpre mare lahta Nam maling kaba na tara nshang hpun shaw ai lam, ndai shata 4 laman hta Ton 1,000 jan lagu shaw dut
Myitkyina Tang Hpre mare lahta Nam maling kaba na hpun shaw ai lam, ndai shata 4 laman hta grau grau law jat wa taw nga ai nga, makau grup yin hpe yu gawn hkang ai wuhpung ni tsun tawn ai re.
Lai wa sai 2024 ning January shata kaw na April shata du hkra rai yang hpun shaw ai Ton hkying mi jan du hkra shaw wa ai rai nna, dai hpun shaw ai lam hpe lauban nkau hte Pyithutsit ni pawng hpawm nna shaw sha taw nga ai nga, makau grup yin hpe yu gawn hkan nga ai wuhpung ni kaw na KNG shiga dap de tsun ai re.
“Putao lam de gadai hpe mung n lai shangun ai ten, ndai maga hpun grai shaw sha wa ma ai, lai wa sai shata hkan na gaw shaw taw ai, rai tim n dai laman grau law wa ai, nam maling na masak maisaw hpun kaba ni yawng shaw sha ma sai, ndai shata 4 laman hta sha Ton hkying hku shaw sai,” nga tsun ai re.
Ya hpun shaw taw nga ai lam gaw, lai wa sai ten hkan na hta grau grau law wa taw nga ai lam tsun madi madun da ai re.
Ya na zawn hpun shaw sha taw nga ai lam hpe ginra masha ni ninghkap taw ai rai tim, ndai lam hte seng na shawk shawn na lit la ya na asuya tam n mu ai majaw, kaning ndi dai hku yu shalai taw nga ai nga Tanghpre ginra masha ni tsun ai re.
Hpun lagu htaw shalai ai lam hpe shana yup tung ten hta hkrai htaw shalai taw ai majaw, mare masha ni a dumsu nga adawt sat ai lam ni mung nga taw ai lam chye lu ai.
Myitkyina Putao lam kaba hpe pat da ai majaw, gunrai htaw mawdaw hte laga mawdaw kaji ni n mai lai ai rai tim, hpun htaw mawdaw kaba ni gaw shana shagu lai taw nga ai nga matut tsun dan ai re.
Hpun kawa ni hpe ya na zawn gawn hkang makawp maga ai lam n nga ai sha, ding gyeng akyu ai matu jai lang akyu jashawn ai law wa ai majaw, du hkra ladaw kahtet shadang lani hte lani grau grau kahtet wa taw nga ai re.
Myen hpyen dap daru magam zing kau ai hpang, jinghpaw mung kata hpun shaw sha ai lam ni grau grau law jat wa nga ai re.
