Sara Kaba Rev. Dr Hkalam Sam Son Hpe Lawan Bai Dat Ya Na Matu KBC Ndau Laika Shapraw
Myen gumshem dap kahtap rim tawn ai, Sara Kaba Rev. Dr hkalam Sam Son hpe lawan dat ya na hpe myit mada ai lam, Jinghpaw Wunpawng Hkalup Hpung Ginjaw KBC kaw nna, ndau laika shapraw tawn ai re.
Dai ndau laika hta, Sara kaba Rev Dr. Hkalam San Son hpe Myen Shaning Ningnan praw 1 ya shani hta dat dat ya ai rai tim, dai shana hkying (9:30 Pm) aten hta seng ang ai ni kaw na bai sa rim woi mat ai majaw, dum n’ta masha ni hte hpawn KBC hpung shawa yawng kaw na, grai myit tsang nga ga ai nga, tsun da ai re.
Dai majaw, Sarakaba gaw, ya aten asak kaba was ai the rau, hkamja lam n nga, tsi tsi hkam la ra taw ai majaw, dum n’ta de lawan bai wa sa ya na hpe myit mada ai nga, matut tsun da ai re.
Ya na zawn Sara kaba rim woi hkrum mat ai hpang, lawan bai dat ya na matu, KBC kaw na ndau laika shapraw ai hpe n’gun n lu ai nga, KBC hpung masha langai KNG de ndai zawn tsun da ai re.
“Ndau laika shapraw ai grai n-gun nlu ai, Myen hpyen dap woi mat ai hpe gwi gwi hte Myen hpyen dap woi mat ai nga mung n tsun, seng ang ai ni kaw na sha nga tsun da, ngut na mung kalang dat lawan dat ya ngu tsun na malai, myit mada ai nga na sha tsun da, grai n gun n lu ai.” nga tsun ai re.
Lai wa sai April 17 ya shani mungdan ting madang, bawng masha ni hpe shalawt ai hta, htawng dam 6 ning jahkrat da hkrum ai, KBC a Ningbaw Amu Madu Usa Rev.Dr Hkalam Sam Son hpe mung shalawt dat ai majaw, hpung masha yawng kabu aw law n ma hkam sha wa sai re.
Raitim mung, dai shalawt dat ai shana jang, hkying 9 chyen ram kaw na, Myen hpyendap n gun hte Sara kaba n ta kaw sa du nna, kalang ta bai rim woi mat ai gaw, dai ni du hkra n dat ya shi ai re.
Myen hpeyndap gaw,ya ten Sara kaba hpe, Naypyidaw de htawt sit woi na lam shiga amyu amyu pru nga ai majaw, hpung masha yawng myit tsang nga ai sha n ga, Sara Kaba a hkamja lam hte seng nna, yawng myit tsang nga ai rai nga ai re.
