Sinbo Myen hpyen dap Hk.L.Y (141) dap hpe Wunpawng Mungdan Shanglawt Hpyendap KIA hte KPDF pawng hpawm dap ni, April 29 ya jahpawt hkying 7 daram hta zep zi zing madu kau lu sai lam KIA Shiga magam dap lithkam Dukaba Nhpang Naw Bu tsun ai re.
Sinbo Myen Hpyen dap hpe lai wa sai February 10 ya shani kaw na htim gasat hpang wa ai gaw, April 29 ya jahpawt hkying 11 chyen aten hta yawng zep zi padang dip zing madu la lu sai re lam, ndai zawn tsun ai re.
“Sinbo dap hpe gaw anhte lai wa sai February shata kaw na htim gasat hpang ai rai nga ai, gasat dat hkring dat re ndai lang hte rai yang mali lang gasat ai rai na sai, mali lang ngu ai hta 3 ya gasat nna, padang dip zing la lu sai ga rai nga ai, mana kaw na zing hpang ai rai nga ai, dai hpawt hkying 11 chyen kaw gaw tsep kawp zing madu kau lu sai.” Nga tsun ai re.
Dai dap shara hpe February 10 ya shani kaw na htim gasat hpang wa ai gaw, dai ni zing madu la kau ai ten du hkra rai yang, numdaw 4 lang htim gasat wa ai re.
Ndai kalang Sinbo Myen hpyen dap kaba hpe zing madu kau na matu, KIA dap maga na mung hpyen n-gun kaba hte hkyen shajin htim gasat ai zawn, Myen hpyen dap maga na mung ndai nhtoi 3 ya hta nbungli hte laja lana sa htim gap sharu bun wa ai re.
Lahkawng maga laja lana htim gasat hkat ai hta, Myen hpyen dap maga si hkala law wa ai zawn, KIA KPDF dap maga na mung si hkala law wa ai re.
Sinbo Myen hpyen dap hpe htim gasat ai hta, nbungli bawm hte Myen hpyen dap up langai si nna, Nmawk na Sinbo de hpyen garum lung wa ai Myen hpyen hpung hpe hkap shingla ai hta dap up wa hte hpawn Myen hpyen hpung ni hpe hkap lu rim ai lam, shawng lam magam gun ni tsun ai rai tim, Dukaba Naw Bu kaw na a tsawm tup hkrak n chye lu shi ai lam tsun ai.
Myen hpyen dap maga na nbungli hte htim gasat ai majaw, mung shawa marai 3 si nna, nkau hkala hkrum wa ai ni mung nga ai zawn, dum nta law law mung hten hkrum wa sai re.
