Rev.Dr Hkalam Sam Son Hpe Sharen htawng kaw na masat da ai, dum nta langai hta tawn da
San Jep ai lam rai n nga shi
KBC ningbaw Amu madu Usa, Sara kaba Rev. Dr Hkalam Sam Son hpe Myen hpyendap gaw Htawng kaw na shalawt dat ai raitim, dai lani mi laman sha kalang ta bai sa rim la kau ai, dai ni du hkra rai n dat ya shi ai re.
Ya ten Sara kaba hpe Sharen htawng kaw na masat da ai, dum nta langai hta shim lum ai hte tawn da nna, dum n’ta masha ni hpe mung jahkrum na ahkang jaw da ai re nga, Myitkyina htawng hte ni nawn ai sara langai KNG de tsun ai re.
“Shim lum lam a matu ng ana shaga woi mat ai, ya ten du hkra san jep ai lam ni hpa rai n nga shi ai, Hkyuk Htawng magam dap kaw na masat da ai nta langai hta tawn da ai, nta masha ni hpe mung sa jahkrum na ahkang jaw da ai,” nga tsun ai re.
Ya ten sara kaba hpe tawn da ai shara hta, dum n’ta masha ni hte, PCG na lit nga a ni, galoi mung pru pru shang shang galaw mai ai shara rai nna, wang lu wang lang re dum n’ta hta tawn da ai lam chye lu ai.
Ya na zawn Sara kaba Hkalam Sam Son kalang bai rim woi hkrum ai hte seng nna, online ntsa hta shada mara shagun hkat ai lam ni mung byin nga ai re.
Sara kaba hpe Myen shaning ningnan shanii ka-ang ten jahkring gan dat dat ya nna, dai shana jang nan hpyen n-gun hte bai sa rim woi mat ai rai nga ai.
Dai sa rim woi ai shana hta Myen hpyen dap maga de na Sara kaba hpe san ra ai ni naw nga ai majaw ngu tsun let woi mat wa ai rai nna, Sara hpe woi mat wa ai ten, Sara Jan hte PCG Slg Lamai Gum Ja mung hkan nang lawm ai re.
Ya ten Myen hpyen dap gaw, Sara jan hpe, n’ta de bai wa kau shangun sai lam chye lu ai.
Ya na zawn, makam masham hpung ningbaw langai hpe mara kata ga baw dat let tara n lang rim woi ahkyak la, htawng shareng nna, bai dat ya masu, kalang ta bai rim shareng ai lam gaw, shinggyim ahkaw ahkang hpe hpa n sawn ai lam re nga mung masa lam hta shamu shamawt nga ai ramma langai mung ya na zawn tsun ai re.
“Anhte yawng mu ai hte maren sara kaba gaw yawng lasi grawm grawm nan rai mat ai, dai zawn mayak manghkang lam ni law law hpe hkam sha ngut na bai dat dat ya ai rai tim, ya kalang naw bai rim ai ngu gaw, shinggyim ahkaw ahkang hpe hpa zawn n nawn ai ga re, ndai zawn re lam gaw shinggyim ahkaw ahkang tawt lai taw ai nan re. Dai shana jan nan bai sa rim ai hta mung, hpa majaw kaning rai na bai rim ai ngu hpe n tsun ai, brang lang ai lam hpa n nga ai, ndai lam a ntsa anhte sung sung myit yu ra sai,” nga tsun ai re.
Dr.Hkalam Sam Son lawt wa ai aten kadun laman, hpung shawa law law kabu gara ai hte hkap tau hkalum wa ai rai tim, kalang ta bai rim hkrum mat ai majaw myit kahpra, myit tsang let sara kaba lawan lawt wa na matu myit mada nga ma ai re.
Sara kaba hpe lai wa sai 2022 ning December praw 5 ya shani Thai Mung Bankok de tsi tsi sa na matu Mandalay nbungli pa hta hkring nga ai ten, myen hpyendap ni sa rim woi mat wa nna, tara kanu ga baw hpan 3 hte htawng dam 6 ning jahkrat da ai rai nga ai.
