Myutsaw Mungtsaw Myit Hpring Ai Sara Hkun Jaw Li Hpe Mying Nchye Shi Ai Laknak Lang Wunpung Ni Gap Sat
Amyu sha lam hta myit marai hpring hpring hte shakut shaja taw nga ai, Sara Nammye Hkun Jaw Li hpe mying n chye ai laknak lang wuhpung ni kaw na, nta shawng Computer seng kata kaw sa gap sat kau da ai lam chye lu ai.
Dai ni March 18 ya shani ka-ang hkying 12 daram hta, Namti Lambraw yang shi nta kaw hpaw da ai “Jan Ga” Computer seng kaw nga taw ai ten, la masum sengke hte shang wa nna, sinat hte sa gap sat kau da ai lam, Lambraw Yang magam gun langai KNG shiga dap de tsun dan wa ai re.
“N’ta computer seng kaw nga taw ai ten, shawng kaw la kasha lahkawng shang wa ai, မိတ္တူကူး na ngu na shang wa ai da, dai ကူး dat ya ai, dai lahkawng tawm re hte la marai masum bai shang wa ai, shang wa ai hte kalang ta dai shi computer gawk kaw wa gap ai ga rai nga ai, sinat gadun hte 5 lang ram gap ai, shi a hkang ni hpe yu yang 5 lang ram gap hkang hkang ai, baw kaw masum lang hkra ai, kan salum hte yang kaw lahkawng lang hkra ai ” nga tsun ai re.
Sara Hkun jaw li hpe, sinat gadun hte baw kaw masum lang, hkum de lahkawng lang gap sat kau da ai rai nna, gadai laknak lang wuhpung ni re ai ngu hpe ya ten du hkra a tsawm tup hkrak n chye lu shi ai re.
Dai sa gap sat ai ramma marai 3 gaw, Myen ga ga ai sam n sen sen nna, gara kaw na gadai laknak lang wuhpung re ngu ai hpe a tsawm tup hkrak n chye lu shi ai re.
Dai sa gap galau kau da ai ten, n sa n hti shi ai majaw, kalang dat tsi rung de htaw lagat sa mat wa ai rai tim, lam lapran kaw n sa hti mat ai re nga matut tsun dan wa ai re.
Nsa hti mat ai hpang Namti mung shawa tsi rung hta, Sara wun ni a ga lajang jep join gut ai hpang moi mang hpe Lambraw Yang dum nta de htaw wa lu ai re.
Ya gap sat hkrum ai Sara Hkun Jaw Li gaw asak 47 ning hta, Kasha Num kasha 2, La kasha 2 shaprat da lu sai re.
Sara Hkun Jaw Li gaw lai wa sai ten, KBC ramma magam dap hta ramma komiti malawm langai hku na hpaji jaw shang lawm wa ai zawn, Htingnai Ginwang a Ramma hpa-awn, Muna Kyithkai hpa-awn magam lit ni hpe gun hpai wa nna, lai wa sai 10 ning daram kaw na hpaji hpung jat na gabaw hte Nawku hpung magam gun kaw na hkring sa taw ai sara re.
Nawku hpung magam gun kaw na hkring sa taw ai rai tim, ramma ni hpe myu tsaw mung tsaw myit rawng wa hkra lakjet jaw ai lam hte Patjasan amu magam bungli ni hta shakut ap nawng taw nga ai sara re lam chye lu ai.
Ya na zawn marai rawng ai, amyu sha hpe woi gahkyin zinlum taw nga ai Sara Hkun Jaw Li gap sat hkrum ai lam gaw, amyu sha yawng a matu hkrat sum kaba langai re nga, magam gun Sara langai ndai zawn matut tsun ai re.
“Sara Hkun Jaw Li ya na zawn byin mat ai gaw, anhte buga hpung a matu Lambraw Yang buga hpung a matu sha n ga, anhte amyu sha yawng a matu sum kaba sum mat ai ngu na hkam sha lu ai, hpa majaw nga yang, ndai magam bungli hpe gaw shi sha kata lam ramma ni hpe a tsawm chye na hkra chye tsun dan ai rai nga ai, ramma ni yawng myu tsaw myit rawng wa hkra chye zinlum ai wa mung re, dai majaw ya na zawn byin lam gaw anhte yawng a matu sum machyi kaba re” nga tsun dan wa ai re.
Ya na zawn Sara Hkun Jaw Li gap sat hkrum ai lam hte seng nna, amyu sha yawng myit yawn hkyen hkrum nga ai lam Facebook ntsa ni hta ka mara da ai hpe mu lu ai re.
