Sumprabum Myen Hpyen Dap Hpe Htim Shagrawt Taw Nga Ai Hta Minute 15 Kalang Nbungli Bawm Wa Jahkrat Nga

Sumprabum Myen Hpyen dap hpe htim shagrawt taw nga ai hta, Myen hpyen dap maga nbungli hte Minute 15 hta kalang bawm wa jahkrat bun nga ai majaw, dai ni March 18 ya shani du hkra man pa, majan laja lana matut htim gasat taw nga ai lam ginra masha ni kaw na chye lu ai.

March 14 ya shani kaw na Sumprabum Myen hpyen dap hpe KIA pawng hpawm dap maga, numdaw kalang bai htim gasat hpang wa ai gaw, dai ni ten du hkra majan laja lana matut htim gasat hkat taw nga nna, Myen hpyen dap maga nbungli hte laja lana bawm wa jahkrat bun nga ai lam shawng lam magam gun langai KNG de tsun dan wa ai re.

Myen hpyen dap maga Y-12 Nbungli hte minute 15 hta kalang bawm wa jahkrat bun taw ai, kalang wa jahkrat yang 6 lang daram wa jahkrat bun ai, dai wa jahkrat bun ai bawm mung cluster bawm hpan kun? lahkawng lang htawt sit kapaw ai,” nga tsun ai re.

Ya htim gasat taw nga ai Sumprabum Myen hpyen dap gaw, bum marawn galu dik hte tsaw dik bum rai nna, Sumprabum mare mayan kaba dik dap shara re lam chye lu ai.

Hkawnglanhpu Pyithutsit hte Myen hpyen dap pawng hpawm Hpyen n-gun 80 daram gaw Putao kaw na Sumprabum de hpyen n-gun garum sa wa ai ten, KIA dap maga lam lapran hkap shingla gasat ai hta law malawng si nna, nkau hpe jahkrung lu rim ai lam ni mung nga wa ai re.

Dai zawn lam lapran hkap shingla gasat ai hta, Myen hpyen dap hte Pyithutsit dap maga sum machyi lam ni law wa ai majaw, ya ten Putao ginra hta hpyen lahkawn ai lam ni matut galaw tawa nga ai lam ginra masha ni tsun ai.

Sumprabum Myen hpyen dap gaw, lai wa sai English prat kaw na ngang kang hkra gaw de da ai dap shara rai nna, Japan prat hta dai shara hpe English ni kaw na Japan ni bai gasat zing la kau nna, ngang kang hkra shangang da ai dap shara hpe Naywin asuya lakhtak kaw na dai ni ten du hkra Myen hpyen dap kring mading dap jung da ai shara re.

Ya na zawn Moi prat kaw na kring mading dap jung shangang da ai Sumprabum Myen hpyen dap kaba hpe KIA KPF pawng hpawm dap maga lai wa sai March praw 9 ya shani kalang sa gap bun wa ai hpang, 14 ya shani kaw na numdaw kalang bai htim gasat wa ai gaw dai ni ten du hkra majan laja lana gap gasat hkat taw ai re.

Ya ten Sumprabum mare na mung shawa ni yawng tinang man ang ai shara ni de hprawng yen taw nga nna, malu masha hte laga tsi mawan ni mung yak hkak taw nga ai re.