Gauri Krung Maga De Na Myen Hpyen Dap Shara 7 Hpe KIA Dap Lani Mi Laman Htim Shagrawt
Manmaw ginwang, Gauri Krung hta dap jung shara jahkrat da ai Myen hpyen dap post 7 hpe KIA dap maga, lani mi laman htim shagrawt kau lu ai lam chye lu ai.
March 17 ya shani lani mi laman, Laiza hte Mai Ja Yang Lapran Tahkaw Hka hku hte Gauri Krung mayan dap jung shara jahkrat da ai Gat daw Hkyet, Man Da, U Hkring Bum, Bawm Kapaw Bum, Bum Sen Bum, Sang Gang, Hkalung krung dap shara ni re lam chye lu ai.
Dai dap shara ni gaw lai wa sai simsa lam la da ai aten Myen hpyen dap maga htu shadut wa du dap jung shara jahkrat da ai shara ni re lam chye lu ai.
Dai mayan hta matut naw ngam ai KIA Dung 15 ginra na Kai Htum Bum hte Namgyin Li dap shara 2 hpe mung March 18 ya jahpawt hkying 10 daram ten hta matut zing madu kau lau sai lam shawng lam magam gun ni tsun ai re.
Ya ten Laiza hte Mai Ja Yang lapran na Myen hpyen dap yawng hpe KIA htim shagrawt taw nga ai rai nna, Myothit Kung law maga de hpyen majan matut laja taw nga ai re.
