Shiga
Waimaw Shwe Nyaung Pin, Aung Mye (2), Aung Mye (1) Na Hpyen Yen Mung Shawa Yawng Hpe Shaw La Lu Sai
Pat hkrum taw nga ai Waimaw, Shwe Nyaung Pin hte Aung Mye (1) (2) na hpyen yen mung shawa ni yawng lawt pru wa sai lam chye lu ai.
Nhtoi 5 ya daram Myen hpyen dap hpyen ninggang shatai da ai hpyen yen mung shawa ni hpe, dai ni March 13 ya shani Nawku hpung ningbaw ni hte PCG pawng hpawm let sa woi shaw la lu sai re lam, dai hta lawm ai magam gun sara langai KNG de tsun dan wa ai re.
Lai wa sai March praw 7 ya shani Myitkyina Manmaw lam kaba ntsa na Myen hpyen dap hpe KIA dap htim shagrawt wa ai hpang, Myen hpyen dap ni kaw na, mung mare masha ni hpe hpyen ninggan shatai tawn let, pru na ahkang n jaw pat hkum da ai rai nga ai.
Dai zawn pat hkrum taw nga ai, hpyen yen mung shawa ni hpe Nawku hpung ningbaw ni hte PCG ni kaw sa woi shaw la na matu lai wa sai masum ya daram kaw na shakut wa ai rai tim, Myen hpyen dap maga ahkang n jaw ai majaw, dai ni nhtoi 3 ya na ai hpang she sa lu woi shaw la lu ai rai nga ai.
Ya sa woi shaw wa ai hpyen yen mung shawa ni hpe, Waimaw KBC Bawngring Camp hta shara jahkrat da ya ai lam chye lu ai.
Aung Mye (2) hpyen yen mung shawa ni gaw, Hpungkyi jawng wang kata hta, mai byin ai hku matsut rawng taw nga ra ai majaw, asak kaba sai dinggai langai hte dingla langai asak si hkrum wa sai re.
Dai asak si hkrum ai ding gai yan ding la lahkawng hpe, dai mare kata hta sha lup makoi shangun wa ai re lam chye lu ai.
Hpyen yen mung shawa ni hpe sa woi shaw la ai, Aung Mye (1) Aung Mye (2) mayan hta dai hpawt manap jau kaw na laknak kaba hte nbungli ni hte sa gap bun taw nga ai hte majan gap gasat hkat ai lam ni mung matut byin nga ai lam chye lu ai.
Ya ten hpyen yen mung shawa ni pru wa lu sai rai tim, myit shim lum lam ni rai n lu la shi ai nga hpyen yen mung shawa ni tsun ai re.
