Pyithutsit Ningbaw Salang Shwe Min, Waimaw Hka Shi mare makau hta hkap gap hkrum ai hta, dai shara hta nan si mat ai lam, shawng lam magam gun ni kaw na chye lu ai.
March praw 7 ya jahpawt Waimaw Shwe Nyaung Pin Myen hpyen dap Hk.L.Y 321 hpe, KIA dap maga laknak kaba hte sa htim gap gasat wa ai hpang, Myitkyina de hprawng yen pru wa ai ten, Hka Shi mare hta KIA Dung 3 ni hkap shingla gasat ai hta si mat ai re nga, shawng lam magam gun langai KNG de tsun dan wa ai re.
“Dai hpawt manap Shwe Nyaung Pin 321 Myen hpyen dap sa htim gap gasat dat ai, dai kaw na Shwe Min gaw Myitkyina de hprawng wa ai, dai hprawng wa ai hpe KIA Dung 3 ni Hka Shi mare makau hkap gap gasat ai kaw maw daw hte nawng yawng dai kaw si lam mat ai, mawdaw mung yawng hkru mat ai,” nga tsun dan ai re.
Salang Shwe Min na mawdaw hkap gap gasat hkrum ai hta, dai kaw lawm ai laga Pyithutsit hpyenla lahkawng mung si lawm mat ai hpe mu lu ai re.
Ya na zawn Salang Shwe Min gap sat hkrum ai lam hte seng na, nta masha hte laga lit nga ai ni hpe KNG maga phone set matut ai rai tim n lu matut ai re.
Salang Shwe Min gaw, Myen hpyen dap hpe madi shadaw ai Pyithutsit hpung hpaw nna, KIA hpe ninghkap shingla gasat taw nga ai Pyithutsit ningbaw langai mung rai nga ai.
2020 ning ra lata poi hta Lisu amyusha hkring mang shara hta ra lata poi dang da ai wa mung rai nga ai re.
Lai wa sai shata ni hta mung, Waimaw Aungmye Thit hte Jam Ga mare kahtawng ni hkan na Lisu amyu sha nta langai na hpyen la marai langai n galaw n mai, hpyen hkan rim lahkawn taw nga ai re.
