Sam Hkyeng Pyithusit Ni Jahkrit Shama ai Majaw, Na Mawn Ginra Masha ni Hprawng Yen

Nawnglut ginwang, Na Mawn mare hta Sam Hkyeng Pyithutsit dap ni mare kata de jahkrit shama wa ai majaw, mung mare masha ni hprawng yen hkawm ra taw ai lam chye lu ai.

January 23 ya shana hkying 9 daram hta dai ginra kaw hpyen lahkawn taw nga ai Sam hkyeng Pyithutsit hpung ni hpe KIA dap Drone hte sa gap bun ai hpang majan byin wa nna, Sam hkyeng Pyithutsit dap ni mung shawa ni hpe jahkrit shama ai lam ni galaw wa ai nga, dai ginra na mung shawa langai KNG shiga dap de ndai zawn tsun dan wa ai re.

“Shan hte hpyen lahkawn taw nga ai, dai hpe KIA dap ni sa gap ai, dai hpang Sam Hkyeng ni lam n maw de pru nna, mung shawa ni nga ai de jahkrit shama galaw wa ai rai nga ai, lam maw n tsa hkan sinat gap kapaw jahkrit ai, shan hte lai hkawm ai hkan jinghpaw nta re i? n re i? nga san jahkrit hkawm nna rim ai lam ni galaw wa ai,” nga tsun dan wa ai re.

Sam hkyeng Pyithutsit dap ni dai zawn jahkrit shama ai majaw, Na Mawn mare hta nga ai Jinghpaw nta ni yawng Hopin hte Lung Tung maga ni de hprawng yen taw nga ai re lam chye lu ai.

Dai zawn hprawng yen ai hta ya ten Hopin Buga Hkalup Hpung nawku jawng wang de hpyen yen mung shawa 200 jan du nga nna, dai ni a matu malu masha hte laga garum ningtum lam ni ra ahkyak taw nga ai lam chye lu ai.

Na Mawn mare de na hprawng yen pru wa ai mung shawa n kau gaw, tinang jinghku ni nga ai shara de hprawng yen ai ni nga ai zawn, nawku hpung wang hte laga hpungkyi jawng ni de hprawng yen ai ni mung nga taw ai lam, Hopin nawku hpung na lit nga ai sara langai KNG de ndai zawn matut tsun dan wa ai re.

“Ya masha jahpan gaw 200 jan ram re, n kau gaw jinghku ni nga ai Nam Mana de lai lung mat wa ai ni nga ai, nkau mi gaw Hopin ginra kaw nga ai tinang nawku hpung RC Kahtawlik zawn re tinang the seng ai nawku hpung, hpungkyi jawng ni de yen ai nga ai, ya anhte Hopin nawku hpung kaw na gaw hpung ginra nta ni hta tawn da nna, mai byin ai hku garum madi shadaw ya nga ga ai,” nga tsun dan wa ai re.

Ya ten hpyen yen ni hpe nawku hpung kaw na dang di ai daram garum jaw nga ai rai tim, aten galu na wa ai rai yang, yak hkak wa mai ai majaw, yawng jawm madi shadaw garum la na matu matut tsun da ai re.

Na Mawn mare hte Hopin mare gaw deng 10 jan sha tsan ai shara rai nna, ya ten dai ginra hta hpyen masa matut shaja hkat taw nga ai re lam chye lu ai.