Sagaing hte Jinghpaw mung jarit, Katha mare kaba num shang shagyit hta Myen hpyen dap ni kaw na hkawm sa hkawm wa yawng hpe laja lana san jep nna, gumhpraw hta sha ai lam ni galaw taw nga ai lam , dai ginra na mung shawa ni tsun ai re.
January 15 ya shani hta mung Katha mare kaba de shang wa ai, Nga Dumsu hpaga la ni kaw na gumhpraw sen 70 hkap mya la kau ya ai lam ni nga ai nga, dai ginra na mung shawa ni KNG de ndai zawn tsun dan wa ai re.
“Shani shagu san jep nga ma ai, Balik da hpyen la da yawng nga ai, sengke ni yawng hpe mung jep ai Toobox hpaw shangun ai, lawm wa ai arai ni yawng hkap gasawk jep ai, mani nga yang plastic majaw kaw gumhpraw makai da ai, sen 70 ram lawm ai, yawng hkap kashun la kau ya ma ai, Nga Dumsu hpaga la ni na re,” nga tsun dan wa ai re.
Dai shara hta Balik hte Hpyenla n gun marai 40 daram dung ai shara rai nna, gunrai htaw mawdaw ni hkan mung laja lana sawk jep tam nna, shan hte ra ai daram gumhpraw hkap hta sha ai lam ni galaw taw nga ai lam matut tsun dan ai re.
Dai shagyit gaw, Myen hpyen dap daru magam zing kau ai hpang wa du dap jung ai shara rai nna, ya ten dai shara hpe banger gaduk ni hte kring mading rai galaw da ai shagyit re lam matut chye lu ai.
Dai shara gaw, Katha mare kaw na gara de pru hkawm na rai tim, lai di ra ai shagyit rai nna, dai shara hta kring mading rai dap jung shara jahkrat da nna, ya na zawn mung shawa ni hpe ding bai ding na jaw taw ai shara re lam ginra masha ni matut tsun ai.
Dai sha n-ga, Katha muklum kata hkan mung, mung shawa hking hking let, mung shawa mawdaw jawn nna, hkan yu gawan shinggrup ai lam ni galaw nna, shan hte n tsen n hten ai ni hpe san jep ai lam ni mung galaw taw nga ai re.
Myen hpyen dap ni ya ten Katha muklum kata, nta tsaw ai htap shara ni hta shara la nna, laga asuya rung ni hta mung shim lam jahkrat taw nga ai re.
Lai wa sai December shata hta, Myen hpyendap (ကျားဘီလူး) hpyen hpung ni Katha ginwang kata de shang wa nna, mung shawa marai 2 hte, PDF magam gun marai 5 hpe gap sat kau ai lam ni nga wa sai re.
