Myitkyina masat 2 Balik dap makau hte, Shwe Min nta makau ni hta bawm kapaw wa ai lam ginra masha ni kaw na chye lu ai.
January 15 ya shana hkying 7 daram hta, Myitkyina Hkemathiri hte Rambu lawk jarit mayan hta Bawm kaba 5 lang ram ngoi wa ai nga, dai ginra na mung shawa ni KNG shiga dap de tsun dan wa ai re.
“Shawng nnan lang na grai ngoi ai, dai hpang gade nna ding yang bai ngoi wa ai, nkau gaw U Shwe Min nta de re nga, nkau gaw balik dap de re nga, hkrit na gadi mung a tsawm n gwi pru yu ai ga rai nga ai,” nga tsun dan ai re.
Dai bawm kapaw wa ai lam hte seng na, gadai gara wuhpung ni sa kapaw ai re ngu hpe a tsawm tup hkrak n chye lu ai rai tim, Slg Shwe Min nta hpe sa kapaw ai masa re nga, ginra masha ni tsun maram da ai re.
Dai zawn bawm kapaw ai hta masha si hkala ai lam nga n nga hte, gara shara hpe yaw shada na sa kapaw ai ngu hpe KNG maga a tsawm tup hkrak n chye lu ai re.
Bawm kapaw wa ai hpang, Myen hpyen dap ni kaw na dai makau grup yin lam ni yawng hpe pat kau nna, lai sa lai wa mung mare masha ni hpe san jep wa ai re lam chye lu ai.
Ya Bawm kapaw wa ai shara gaw, masat 2 balik dap hte Ginwang balik rung daju makau ni hte ni ai shara re.
Myitkyina muklum kata ya na zawn bawm kapaw ai n sen nna ai na sai rai tim, n dai laman jahkring hkring bai ngoi wa ai rai nga ai.
