Putao, NohMung, Hku Hti mare na asak kaba sai ni hta garum ningtum ra ahkyak taw nga ai lam chye lu ai.
Nta htinggaw 6, masha marai 20 daram sha nga ai, Hku Hti mare hta, asak 60 hte 90 ning lapran na asak kaba ai dinggai dingla marai 16 gaw, madung malu masha ra gadawn nga nna, dum n’ta ni hpe gram lajang la na matu, garum ningtum ra taw nga ai nga, asak kaba ni hpe yu lakawn taw nga ai ramma langai KNG de tsun ai re.
“Asak kaba ai ni madung gaw bungli n lu galaw mat sai, mare kaba ni de mung n kam htawt sit ai majaw, moi nga lai wa ai bum mare hta sha matut nga taw ai majaw, malu masha ra gadawn wa ai rai nga ai, ngut na dum nta gram lajang la na matu mung ra taw ai ga rai nga ai,” nga tsun ai re.
Dai mare na asak kaba sai ni gaw, madung hkai sun bungli n lu galaw mat sai sha n ga, mai byin dang di a daram galaw da ai yi sun ni hta, nga dumsu yawng jahten kau hkrum ai majaw, ya na zawn garum ningtum ra taw ai re lam tsun ai..
Dai mare na asak kaba ai ni hta, asak 80 hte 90 ning lapran marai 5 nga ai hta, hkam ja lam n nga ai majaw, tsi mawan ni mung matut ra gadawn taw nga ai re.
Nawng Mung hte Deng 13 daram tsan ai, Hku Hti mare gaw, lai wa sai 10 ning jan hta n ta htinggaw 80 daram nga ai mare kahtawng rai nna, dai mare hta hkai lu hkai sha yak hkak wa ai majaw, mare kaba de yawng htawt sit mat nna, ya ten dai mare hta marai 20 daram sha nga mat sai mare re lam chye lu ai.
