Hpakant Myen hpyen dap shara 4 hpe, KIA dap kaw na, January praw 6 ya jahpawt sa htim gap gasat ai kaw na, dai ni du hkra majan matut manoi byin taw nga ai lam chye lu ai.
January praw 6 ya jahpawt Hpakant Myen hpyen dap shara 4 hpe KIA PDF pawng hpawm dap ni htim gasat ai hta, Myen hpyen dap maga sum machyi lam law wa nna, dai dap shara hpe Myen hpyen dap gan hting nut da ai hpang, nbungli hte laja lana wa gap bun ai lam nga ai hpe chye lu ai.
“Anhte PDF dap ni nga na shadu ai shara kaw, Nbungli bawm hte wa jahkrat bun ai, bum langai gaw zing da sai, grau tsaw ai bum naw ngam ai, dai ngam ai bum hpe makawp na matu, nbungli hte wa gap taw ai ga rai nga ai, laknak kaba gap bun taw ai gaw, San Chyoi hte Hpakant Myen hpyen byuha dap kaw na laknak kaba gap bun ya taw ai rai nga ai,” nga tsun dan ai re,
Ya ten, Gwi Hka Myen hpyen dap hpe KIA dap maga matut htim gasat taw nga ai rai nna, dai ginra na mung shawa hkying lahkawng daram, Seng Tawng mare de hprawng yen du wa ai nga, dai ginra na mung shawa langai KNG shiga dap de ndai zawn tsun dan ai re.
“Gwi Hka mare maga de na hprawng yen pru wa ai mung shawa hkying 2 daram nga ai, dai ni hpe hpungkyi jawng hte Nawku jawng wang ni hta shara jahkrat da ai, madung gaw malu masha hte hpun n ba garum ningtum ra ahkyak taw nga ai,” nga matut tsun ai re.
Matut na rai tim, Kamaing hte Hpakant lam lapran Namting mare hta mung majan laja lana gap gasat hkat wa nna, ya ten du hkra Namting mare hpe lu zing la ai lam n nga shi ai sha hpyen masa matut shaja hkat taw nga ai lam chye lu ai.
Namting mare hta dap jung nga ai Myen hpyen hpung ni gaw, kaduk kata hta sha rawng makoi nga let, hkap shingla gasat taw ai majaw, KIA dap maga de na mung n lu gasat zing la shi ai zawn, dai bum pawt mayan hte yu sin hkan taw ai masa re nga, shawng lam magam gun langai KNG de ndai zawn matut tsun dan wa ai re.
“Namting hpe gaw rai n lu zing shi ai, Myen hpyen dap maga kaduk kaw rawng na naw shingla gasat nga ai, anhte maga na ni mung, bum pawt hkan yu sin hkat taw ai ga rai nga ai, dai ni gaw grai wa laja lana nbyin ai,” nga tsun dan ai re.
Dai zawn hpyen masa shaja hkat taw nga ai ten, mare kata hpyen majan byin wa na hpe myit tsang ai majaw, Namting mung mare masha ni gaw, Deng 6 mare hta sa hprawng yen taw nga ai lam chye lu ai.
Ya ten Hpakant lam mayan de majan bai gap gasat wa ai majaw, lam kaba makau na mare kahtawng ni rai nga ai, Gat Noi, Hkrai Run, Senghpra, Nam Ya mare hkan na mung mare masha ni tinang man ang ai shara ni de hprawng yen hkawm taw nga ai lam chye lu ai.
Ya ten Hpakant ginra hta, Majan laja taw nga nna, Myen hpyen dap maga na laknak kaba ni ding yang matut manoi gap gasat nga ai zaw, Nbungli hte mung wa gap sharu bun nga ai re.
