Putao hte, Hkawng Lan Phu lapran, Hkrang Hti Dam mare hta dap jung tawn ai Myen hpyen dap hte, Pyithutsit dap hpe, KIA woi awn ai hte, Kagabu People Force (KPF) dap ni January praw 7 ya shani zep zi htim gasat zing madu kau lu sai lam, chye lu ai.
Hkrang Hti Dam Myen hpyen dap hpe January praw 2 ya shani kaw na htim gasat hpang wa ai rai tim, Myen hpyen dap maga de na nbungli hte laja lana wa htim gap gasat ai majaw gan hting nut da ai kaw na, January praw 7 ya shani hta yawng htim gasat zing kau lu sai re nga, KPF hte ni nawn ai ni, KNG shiga dap de tsun ai re.
“Ya hte nbungli hte grai wa gap bun wa ai majaw, jahkring gan yen da ai, ndai laman bai sa htim gasat ai, ya gaw zep zi htim gasat zing kau lu sai, ndai lam hte seng na yawng ngut sai.” nga tsun dan ai re.
Myen hpyen dap nbungli hte wa htim gap gasat ai hta, KIA pawng hpawm dap maga sum machyi lam nga wa ai zawn, Myen hpyen dap ni yawng hprawng hting nut mat sai re lam matut tsun dan ai re.
Ya ten dai ginra de Phone Internet line yak hkak ai majaw, majan masa lam hte seng na kata lam a tsawm tup hkrak chye lu na matu matut yak hkak taw nga ai re.
Dai ginra hta Hkawng Lan Phu Pyithutsit dap ni up madu da ai shara rai nna, Myen hpyen dap daru magam zing kau ai hpang, Myen hpyen dap ni mung bai wa du dap jung ai shara re lam chye lu ai.
Ya gap gasat zing kau ai, Hkrang Hti Dam mare gaw, Putao hte Hkawnglanphu mare lapran a matu ahkyak ai dap shara rai nna, dai dap shara hpe htim gasat zing kau ai rai yang, Hkawng Lan Phu de du na n yak mat sai nga, dai ginra na mung shawa ni tsun maram da ai re.
