Mungmyit sinli ga, Kutkai hte Sinli mare kaba lahkawng hpe dingdung daw dap hpawm hpung ni kaw na htim gasat zing madu kau sai lam chye lu ai.
Kutkai byuha kawng Myen hpyen dap kaba hta, January praw 7 ya shani dawng hkawn hpraw sharawt laknak jahkrat asum jaw ai hpang, lahkawng maga dap ni jahkrup bawng ban taw nga ai nga, dai ginra na garum kahtau hpung na lit nga ai ni KNG de ndai zawn tsun ai re.
“Grai wa htim gasat na lu zing madu la ai hku nre, Myen hpyen dap maga အလံဖြူ madun nna laknak jahkrat ai masa re ngu mu mada, ya gaw lahkawng maga jahkrup bawng ban nna Kutkai mare gaw dap hpawm lata de rai sai ga rai nga ai.” nga tsun dan ai re.
Dai zawn lahkawng maga, jahkrup bawng ban taw nga ai ten, Myen hpyen dap maga, nbungli hte wa gap gasat ai lam, malu masha laknak machyu pala wa jahkrat ai lam ni naw nga ai nga, garum kahtau hpung ni matut tsun dan wa ai re.
Ya ten Kutkai ginra yawng hpe Balawng TNLA dap maga lu zing madu da sai lam, tsun ndau tawn ai re.
Matut na rai tim, Sinli kawng hta naw ngam taw ai Myen hpyen dap Ts.K.Hk (16) hpe January praw 7 ya shani gawt shapraw kau lu sai majaw, ya ten Sinli pa hta Myen hpyen dap tsep kawp n nga mat sai lam, dingdung daw daphpawm hpung maga tsun ndau da ai re.
Mungmyit Sinli ginra hta, Myen hpyen dap hte dingdung daw dap hpawm hpung ni majan laja lana htim gasat taw nga ai nhtoi 70 ya jan na wa ai ten, Sammung dingdung daw yawng ngu na daram hpe htim gasat shagrawt kau wa lu ai rai nna, Myen hpyen dap shara 400 hkawt hpe lu zing madu kau sai lam, chye lu ai.
