Waimaw Aungmye Thit mare na mung shawa marai 2 hpe, Shwe Min Pyithutsi hpung ni adup gayet zingri nna rim woi mat ai lam ginra masha ni kaw na chye lu ai.
December 28 ya jahpawt, Aungmye Thit mare manap gat hta nga taw ai Slg Lashi Naw Lawn hpe, Pyithutsit hpyen n-gun kaba hte sa rim woi mat ai re nga, dai ginra na mung shawa langai KNG shiga dap de tsun dan ai re.
December 27 ya shana hta mung, tinang nta nga taw ai, Slg Htumshing Nu Ting hpe sa rim woi mat ai lam chye lu ai.
Dai salang yan lahkawng hpe na zawn sa rim woi ai lam gaw, KIA hte matut mahkai nga ai ngu n tsen n hten ai hte rim woi mat ai re nga ginra masha langai ndai zawn tsun ai re.
“Madung gaw KIA hte matut mahkai nga ai ngu ntsen ai hte sa rim woi ai ga rai nga ai, kaja nga yang shan lahkawng gaw shanglawt hte hpa mung n seng ma ai, nta kaw nga let yi sun galaw na nga ai yen rai ma ai,” nga tsun ai re.
Dai rim woi hkrum ai yan lahkawng hta na Slg Nu Ting hpe dingdung daw Myen hpyen dap san jep shara de sa kau nna, manap gat na rim woi da ai Slg Lashi Naw Lawn hpe kaw Pyithutsit dap hta san jep taw ai re lam chye lu ai.
Ya rim woi hkrum ai yan gaw, KIA magam gun mung n re zawn, gadai hte mung matut mahkai n nga na, nta hta yi sun galaw na sha nga ai mung shawa jet jet yan re lam ginra masha ni matut tsun ai re.
Slg Shwe Min woi awn ai Pyithutsit hpung ni gaw, lai wa sai November shata kaw na, nta langai hpyenla n galaw n mai hkan rim lahkawn taw nga ai rai nna, KIA hte matut mahkai nga ai ngu n tsen n hten ai ni hpe jahkring hkring rim zingri san jep ai lam galaw taw ai hpe chye lu ai.
