Naga ginra Lay He ginwang kata na ramma nkau hte Myen hpyen asuya magam gun ni hpe hkatum manu jaw let, hpyen wunkat sharin ya taw ai lam, ginra masha ni kaw na chye lu ai.
Lai wa sai November 20 ya daram kaw na Lay He ginwang kata Myen hpyen dap n pu asuya magam gun taw ai marai 100 jan hpe hpyen wunkat jaw ngut ai hpang, ya kalang dai ginra na ramma ni hpe bai jaw na matu hkyen taw nga ai lam ginra masha langai KNG de ndai zawn tsun ai re.
“Myen hpyen asuya magam gun ni ngut mat sai, ya kalang gaw ramma ni hpe bai shaga mahkawng nna, hkatum manu 7000 jaw let hpyen wunkat hpe sharin ya nga ma ai,” nga tsun ai ai re.
Numdaw langai ngu na ni wunkat yu mat ai hpang, ya numdaw lahkawng lang ngu na ni hpe bai hpaw sharin hkyen taw nga ai hta, dai ginra na ramma ni hpe atit anang hkan shaga lahkawn taw nga ai lam chye lu ai.
Mare kata nga ai mung shawa ni hpe dai hku yu maya shaga yang n sa ai majaw, hkatum manu 7000 jaw nna, hpyen wunkat jaw ya taw ai re lam chye lu ai.
Ya ten dai ginra hta malu masha hte gunrai manu ni mala la tsaw rawt taw ai majaw, ginra masha ni hku na gumhpraw lu lam hpe sha myit let sa sharin hkam la taw nga ai re nga ginra masha ni tsun ai re.
Ya na zawn hpyen wunkat jaw da ai hpe, kaja tatut hta kaning rai woi jai lang akyu jashawn na ngu ai hpe gaw a tsawm tup hkrak n chye lu ai lam tsun ai re.
