Mungmyit Sinli, Kutkai hte Sinli mare ni hta Phone Internet line yawng pat kau ya nna, Myen hpyen dap hte dingdung daw dap hpawm ni lapran majan laja lana matut gap gasat hkat taw nga ai re.
Kutkai mare kaba hta Myen hpyendap shara ni hpe dap hpawm hpung maga htim gasat taw nga ai zawn, Myen hpyen byuha dap kaw na mung, laknak kaba ni ding yang gap bun taw nga ai lam ginra masha ni tsun ai re.
“Ya Kutkai pa kaw gaw nsin chyip rai mat sai, hpa line mung n lu ai, sinat kaba mung shani shana dai hku ngoi taw ai, nbungli mung jahkring hkring wa ai, nga taw ngu yang gaw hkrit ra, hprawng ngu yang gaw hprawng lam n mu rai, dai hku rai nga ga ai lo,” nga Kutkai ginra masha langai tsun dan wa ai re.
December 24 ya jahpawt hta, mung mare masha langai, gadai hkam da ai re n chye ai bawm kabye kapaw la hkrup nna, lagaw lahkawng maga daw kau ra ai lam chye lu ai.
Sinli mare hta mung, December 23 ya shani n bungli hte wa gap bun ai hta, mung shawa marai 3 si nna, marai 6 hkala sawng wa ai lam chye lu ai.
Ya ten dai ginra hta Myen hpyen dap maga de na, n bungli hte shani shagu ngu na ram wa htim gap taw nna, Mung shawa nta hten hkrum ai lam ni ding yang matut byin taw nga ai re.
Kutkai mare kaw na hprawng yen pru wa ai mung shawa hkying 2 jan gaw, ya ten malu masha hte, hkam ja lam a matu tsi mawan garum ningtum ni ra ahkyak taw nga ai re lam chye lu ai.
