Sinli Mare kaba hta Kokang MNDAA dap ni gaw, Mare salang ni hpe shaga la nna, mare uphkang masa lam hte seng na, zuphpawng woi galaw wa ai lam chye lu ai.
Sinli mare kaba makau grup yin hta nga ai mare salang ni hpe December 16 ya shani shaga la nna zuphpawng woi galaw ai nga nna, mung shawa langai KNG shiga dap de tsun dan wa ai re.
Dai zuphpawng hta mare lawk shagu de na, salang marai 60 jan sa shang lawm wa nna, Kokang dap maga de na mung lawng lam 6 hpe tsun sang lang mat wa ai re nga tsun ai re.
Dai zuphpawng hta, Jawng Sara, Saranum hte, Tsi magam gun ni a mying jahpan hpe, Kokang dap de jaw ya na lam, Kokang dap ni kaw na mung shawa hpe roi rip wa ai rai yang shawk shawn na lam, Kokang woi awn ai hte gunrai dut ginlen ai lam galaw na lam, Kokang dap up madu da sai shara hta laga laknak lang wuhpung ni hkawn kang sa hta yang n bang na lam, Internet lang ai ni a mying jahpan jaw na lam, Nang Hpam lu sha ai ni hpe lu rim yang bai n dat na hte, hpyen la galaw shangun na re lam, dai ni hpe tsun sang lang dan wa ai nga, tsun ai re.
Mungmyit Sinli ginra hta, Kokang dap ni Myen hpyen dap shara law law hpe zing madu da lu sai rai nna, shan hte a uphkang hkrang hte sa taw sai re lam chye lu ai.
